Саха Өрөспүүбүлүкэтин олох-дьаһах коммунальнай хаһаайыстыбатын (ОДьКХ) миниистирэ Вячес... — 19 августа 2026 г. в 05:33:12.139
Саха Өрөспүүбүлүкэтин олох-дьаһах коммунальнай хаһаайыстыбатын (ОДьКХ) миниистирэ Вячеслав Емельянов бэҕэһээ Уус Алдан улууһугар тахсан, коммунальнай хаһаайыстыба туругун миэстэтигэр көрдө-иһиттэ. Сырыыта үтүө түмүктэрдээх буолла. Миниистир сүрүн сорудаҕынан өрөспүүбүлүкэ үрдүнэн Уус Алдан улууһа дьиэ-уот коммунальнай хаһаайыстыба өҥөтүгэр иэһэ суох улуустартан биирдэстэрэ буоларынан ОДьКХ үлэһиттэрин хамнастара бастакынан төлөнөрүн хааччыйыы буолла. Бу чэрчитинэн бүгүн СӨ ОДьКХ судаарыстыбаннай унитарнай тэрилтэтин генеральнай дириэктэригэр Виталий Чикачевка Уус Алдан улууһун ОДьКХ үлэһиттэригэр хамнастарын ыытыы, котельнайдар бигэтик үлэлииллэрин хааччыйыыга оттук чоҕу киллэрэр тыраахтардар өҥөлөрүн төлөһүүгэ сорудахтаата. Бороҕон илин өттүгэр Маяк түөлбэҕэ тутуллуохтаах саҥа котельнай үбүлээһинин хонтуруолга ылан, быйылгы кыстыкка үлэҕэ киирэригэр эрэннэрдэ. Бу эбийэк 108 ыалы, ол иһигэр аҕыс анал байыаннай дьайыы кыттыылааҕын дьиэ кэргэнэ уонна 37 элбэх оҕолоох ыал дьиэтэ ититии ситимигэр холбонуоҕа. Тулуна бөһүөлэгэр «Теплосеть +» тэрилтэ үп-харчы тиийбэтинэн кэлэр кыстыкка бэлэмэ суоҕун учуоттаан, улуус дьаһалтатын кытта бииргэ үлэлэһэн кыһалҕаны туоратарга сорук туруорда. Ону таһынан тарыыптар икки ардыларынааҕы араастаһыыны толуйар субсидияны төлүүргэ агенствоҕа сорудах бэрилиннэ. Миниистир төһө даҕаны кэккэ кыһалҕалар баалларын үрдүнэн, Уус Алдан улууһа кыстыкка бэлэмнэниитэ атын улуустартан инники күөҥҥэ сылдьарын тоһоҕолоон бэлиэтээтэ. Коммунальнай хаһаайыстыба өҥөтүгэр иэһэ суох улуустартан биирдэстэрэ буоларбытынан, улуус дьаһалтатыгар махталын биллэрдэ. Улуус дьаһалтатын пресс-сулууспата.