Бүгүн СӨ ОДьКХ миниистирэ Вячеслав Емельянов Уус Алдан улууһугар үлэлээтэ. — 18 августа 2026 г. в 12:26:27.286
Бүгүн СӨ ОДьКХ миниистирэ Вячеслав Емельянов Уус Алдан улууһугар үлэлээтэ. Биһиги улууспутугар 11 итиинэн хааччыйар тэрилтэҕэ 56 котельнай уонна 5 тепловой пуун баар. Бүгүҥҥү күн туругунан оттук сезонугар киириигэ биһиги улууска кэккэ ыарахаттар бааллар. Сүрүн төрүөттэрэ биир – анаммыт субсидия харчыта кэмигэр кэлбэтэ хочуолунайдар үлэлииллэригэр харгыстары үөскэтэр. Төһө да улуус бюджетыгар үп-харчы тиийбэт эрээри, быйылгы кыстыкка кирии үлэ хаамыытынан улуус дьаһалтата социальнай эбийиэктэр ититиилэрин ситимин ыраастааһыҥҥа, промывкалааһын үлэтигэр 6 мөл. суммалаах харчыны көрөн, үлэ бара турар. Ол да буоллар бүгүҥҥү күҥҥэ ордук уустук балаһыанньа Тулуна бөһүөлэгин «Сыһыы» хочуолунайыгар бэлиэтэнэр. Бу хочуолунай сыллааҕы ороскуотуур чоҕо 860 туонна. Хочуолунайы тутан олорор «Теплосеть +» хааччахтаммыт эппиэтинэстээх тэрилтэ үп-харчы тиийбэтинэн, чоҕу кыайан атыыласпата, онон бу 2026 - 2027 сыллардааҕы оттук сезонун аһардар туруга суох балаһыанньаҕа олорор. Бу балаһыанньаны билсэ бүгүн миниистир Вячеслав Павлович Тулунаҕа миэстэтигэр тиийэн көрдө-иһиттэ, итиэннэ олохтоору кытта көрсөн кэпсэттэ, бэриллиэхтээх субсидия харчыта хамсаабытын иһитиннэрдэ уонна улуус дьаһалтатын кытта бииргэ үлэлэһэн, оһохторун саҥардарга сорук ылыннылар. Салгыы миниистир Бороҕон илин өттүгэр Маяк түөлбэҕэ "ТМС+" хааччахтаммыт эппиэтинэстээх тэрилтэ саҥа тутуохтаах котельнайын бырайыагын билистэ. Саҥа котельнай тутуутун харчыта бу күннэргэ быһаарыллан, тутуутун үлэтэ сотору кэминэн ыытыллыаҕа, икки ыйынан хойутаан да буоллар, трассата тардыллан бэлэм турар 108 ыал ититии ситимигэр холбонуохтара диэн эттэ. Эбийтэктэринэн сырыы кэнниттэн улуус дьаһалтатын дьиэтигэр итиинэн хааччыйар тэрилтэлэр салайааччыларын, нэһилиэк дьаһалталарын баһылыктарын кытта кыстыкка бэлэмнэнии боппуруоһугар мунньах ыытылынна. Вячеслав Павлович бу кэмҥэ өрөспүүбүлүкэ үрдүнэн ОДьКХ балаһыанньатын билиһиннэрдэ, өйдөммөт, кыаллыбатах боппуруостары сиһилии быһаарда. Мунньахха олох-дьаһах коммунальнай хаһаайыстыбатын үлэһиттэрэ санааларын эттилэр, кыһалҕалаах боппуруостарын туруорустулар. Утары атах тэпсэн олорон, кэккэ кыһалҕаларын кытта быһаарсан, аһаҕастык ирэ-хоро кэпсэтэн, астынан тарҕастылар. Түмүгэр анал байыаннай дьайыы кыттылааҕа Виктор Егоров дьиэ кэргэнин кытта көрсөн кэпсэттэ, олохторун-дьаһахтарын кытта билистэ. Кинилэр сүрүн кыһалҕалара дьиэлэрин ититии-ситимигэр холбооһун буоларын иһитиннэрдилэр. Миниистир бу боппуруос сотору кэминэн олоххо киириэ диэн эрэннэрдэ. Улуус дьаһалтатын пресс-сулууспата.