Салгыы улуус баһылыга Василий Алексеев Байаҕантай нэһилиэгэр үлэни-хамнаһы билистэ. — 13 августа 2026 г. в 11:21:23.932
Салгыы улуус баһылыга Василий Алексеев Байаҕантай нэһилиэгэр үлэни-хамнаһы билистэ. Танда бөһүөлэгэр бу саас "Кэнчээри" оҕо уһуйаана бүтүннүү уокка былдьанан суһал көмө наада буолбута. Өрөспүүбүлүкэ уонна улуус салалталара тутатына дьаһал ылан үлэлээбэккэ турбут иккис корпуһун суһаллык өрөмүөннэтэн, тахсыбыт кыһалҕаны туораппыттара. Салгыы благоустройствотын ситэриэхпит диэн эрэннэрбиттэрин, бу сайын урбаанньыт Савва Алексеев биригээдэтэ тутан, олоххо киллэрдэ. Онон олохтоохтор бу курдук түргэнник үлэлиир усулуобуйа тэриллибитигэр үөрүүлэрэ, махталлара үгүс. Салгыы тутуута сөргүтүллүбүт спорт сааланы көрдүлэр. Быйыл эбии 92 тирэх түһэриллибит. Насоснай станция иһинээҕи монтаж үлэлэрэ ыытылла тураллар. Маны сэргэ Никита Готовцев хаһаайыстыбатыгар сырыттылар. Эдэр хаһаайыстыба салайааччыта Никита Романович быйыл олохтоох Ньургуйаана Борисова хаһаайыстыбатын кытта кыттыһан 14 га бааһына сирин оҥосто сылдьаллар. Быйыл күрүөлээһин үлэтин ыыта сылдьаллар, эһиилгэттэн сиэмэ ыһар былааннаахтар. Эдэр дьон Танда эҥэр суох саҥа сүүрээни киллэрэн, бурдук үүннэриитигэр ылсыбыттарын улуус баһылыга Василий Петрович биһириирин биллэрдэ. Итиэннэ Баатаҕайга "Биэттэ-Агро" хаһаайыстыбаҕа эмиэ эдэр дьон сиэмэ үүннэриититтэн саҕалаан, бурдук мэһийэн, бэйэ бородууксуйатын оҥорон таһаарарга толору кыахтаммыттарын холобур оҥорон кэпсээтэ уонна кинилэргэ саҕалаабыт дьыалаларыгар ситиһиини баҕарда. Улуус дьаһалтатын пресс-сулууспата.