Башҡорт яҙыусылары Урал аръяғы райондарына сәфәргә сыға — 31 июля 2026 г. в 13:00:15.236
Башҡорт яҙыусылары Урал аръяғы райондарына сәфәргә сыға Республикала «Беҙ бергә» ижтимағи-мәҙәни проекты тормошҡа ашырыла башлай. Уға ярашлы, август-сентябрь айҙарында туғыҙ районда — Әбйәлилдә, Баймаҡта, Белоретта, Бөрйәндә, Ейәнсурала, Йылайырҙа, Күгәрсендә, Учалыла һәм Хәйбуллала яҙыусылар һәм шағирҙар менән осрашыуҙар үтә. Йәмәғәтселекте бай программа, әҙәби кисәләр, халыҡ яҙыусыһы Мөнир Ҡунафин, Башҡортостандың халыҡ шағирҙары Ҡәҙим Аралбаев һәм Лариса Абдуллина, билдәле яҙыусы Айгиз Баймөхәмәтов ҡатнашлығында саралар көтә. «Яҙыусы өсөн йәмәғәтселек менән осрашыу һәр ваҡыт мөһим, сөнки тап ошондай осрашыу һәм йәнле аралашыу мәлендә ижад кешеләре үҙҙәренең буласаҡ геройҙарын таба, яңы образдар тыуа, ә кешеләрҙең бөтә шатлыҡтары, көйөнөстәре һәм кисерештәре һуңынан әҙәби әҫәрҙәргә әүерелә. Бындай осрашыуҙар йыл әйләнәһенә үтә. Әҙиптәр һәр саҡ халыҡ менән бәйләнештә, шуға күрә беҙҙе йылы ихлас аралашыу көтә», — тип һөйләне «Башинформ» агентлығына Яҙыусылар союзы рәйесе Айгиз Баймөхәмәтов. Әҙиптәргә уңышлы сәфәр теләйбеҙ! Фото: Олег Яровиков.