Хатыҥ - Арыы «Сандаара» түөлбэтэ — Бурятия түһүлгэтигэр
Хатыҥ - Арыы «Сандаара» түөлбэтэ — Бурятия түһүлгэтигэр Быйыл Хатыҥ - Арыы нэһилиэгин «Сандаара» түөлбэтэ республиканскай конкурска «Лучший проект ТОС» номинацияҕа 3-с миэстэни ылан, Бурятияҕа барар путевканан наҕараадаланныбыт. Улан-Удэ куоракка ТОС-тар фестивалларыгар ыҥырыылаах ыалдьыт буолан, атырдьах ыйын 1 күнүгэр Саха сирин 7 араас улууһуттан хомуллубут 27 киһилээх делегация, 8 күҥҥэ Улан-Удэҕэ айаннаатыбыт. Атырдьах ыйын 4 чиыһылатыгар Бурятия ТОС-тарын республиканскай форумугар 5 площадканан арахсан сырыттыбыт. «От идеи ТОС до результата» диэн туһуламмыт хайысхаҕа 7 ТОС проектарын, идеяларын көрдөрдүлэр. Олус интэриэһинэй, дьоҥҥо наадалаах проектары көрөн-истэн, элбэххэ үөрэннибит, инники үлэбитигэр улахан опыт ыллыбыт. Бурятия Баһылыга Алексей Самбуевич Цыденов норуотугар боростуой сыһыаннаах, дьонун-дойдутун туһугар олус кыһамньылаах, убаастабыллаах салайааччы эбит диэн көрдүбүт. Хас тиийбит сирбитигэр олохтоохтор эрдэттэн бэлэмнэнэн, нaһаа истиҥник көрүстүлэр. Түөлбэлэрин туһугар сыралаах үлэлэрин көрөн сөхтүбүт-махтайдыбыт. Кинилэр былыргы өбүгэлэрин олохторун-дьаһахтарын, традицияларын, культураларын өрө туталлар, киэн тутталлар. Олохтоохтор ТОС буолан олохторо тупсарын өйдөөн, проект бөҕө суруйан, элбэх грант ылаллар эбит. Проект суруйбут Хатыҥ - Арыы администрациятын специалиһыгар Сивцева Надежда Дмитриевнаҕа улахан махталбын тиэрдэбин. Бу айаммытыгар биһигини илдьэ сылдьыбыт салайааччыбытыгар Ксения Михайловна Васильеваҕа уонна «Сардаҥа» ТОС салайааччытыгар Любовь Иевна Мордовскаяҕа улахан махталбын тиэрдэбин! Александра Романовна Платонова, Кыһыл Дэриэбинэ, «Сандаара» түөлбэ салайааччыта