⚜️Кавказ Ищхъэрэм, Урысей Федерацэм я мызакъуэу, адыгэхэр щыпсэу къэралхэми щыцIэрыIуэ ... — 30 марта 2026 г. в 11:44:21.177
⚜️Кавказ Ищхъэрэм, Урысей Федерацэм я мызакъуэу, адыгэхэр щыпсэу къэралхэми щыцIэрыIуэ журналист, тхакlуэ, публицист, къэрал, жылагъуэ лэжьакIуэ, Урысей Федерацэм щэнхабзэмкIэ щIыхь зиIэ и лэжьакIуэ, КъБР-м, АР-м, КъШР-м щIыхь зиIэ я журналист ХЬЭФlЫЦlЭ МУХЬЭМЭД и ныбжьыр нобэ илъэс 80 ирокъу! ⚜️Лъэпкъылl щэджащэм Къэбэрдей-Балъкъэр къэрал университетыр къызэриухрэ къалэну иlар къызыхэкlа лъэпкъым хуэлэжьэнырщ, газет, тхылъ, журнал къыдэгъэкlынырщ, иджыри жыджэру а lуэхухэм иужь итщ. ⚜️«Адыгэ псалъэм» и редактор нэхъыщхьэу илъэс 24-кlэ лэжьащ Мухьэмэд, «Черкесское зарубежье», «Нарт», «Хасэ» газетхэри къыдегъэкl, Къэбэрдей Адыгэ Хасэм и тхьэмадэщ, ЩIДАА-м и вице-президентщ, «Адыгэ щIэнгъуазэ» институтым и унафэщIщ, ДАХ-м и Хасащхьэм хэтщ. ⚜️Ныбжь дахэм нэсами, иджыри зи къаруилъыгъуэм хуэдэу жану и лэжьыгъэм пэрытщ, республикэм и жылагъуэ-политикэ гъащ1эм жыджэру хэтщ. ФIыщIэншэ, щытхъуншэ хъуркъым Мухьэмэд и лэжьыгъэр. Адыгэ щэнхабзэм зиужьыным хуищIа хэлъхьэныгъэхэм, хамэ щIыпIэхэм щыпсэу адыгэхэм яхуиIэ пыщIэныгъэ быдэм папщIэ Дунейпсо Адыгэ Фондым и «Отличие» саугъэтыр къратащ. ⚜️Адыгэ хэкухэм щызэфIигъэкI лэжьыгъэшхуэр, лъэпкъыр зэшэлIэжынымкIэ, зиужьынымкIэ и журналист зэфIэкIым и инагъыр къалъытэри, абы къыфIащащ цIэ лъапIэ куэд, саугъэтышхуэ куэдым я лауреатщ, къыхуагъэфэщащ «Пщ1эрэ Щ1ыхьрэ» абхъаз орденыр, «Адыгеим и щ1ыхь» медалыр. ⚜️И гъащIэм ириплъэжа иужь, ар IуэхукIэ гъэнщIауэ зылъагъужым и насыпщ. Апхуэдэ насып иIэщ ХьэфIыцIэ Мухьэмэд. Абы и гъащIэм и дэтхэнэ махуэри, мазэри, илъэсри Iуэху щхьэпэкIэ, лъэпкъым хуэгъэпса лэжьыгъэ дахэкIэ гъэнщIащи, дохъуэхъу дяпэкIи узыншэну, гуащIафIэу лъэпкъым хуэлэжьэну! «Адыгэ псалъэ» газетым и редакцэ.