Хәйбулла районының Йәнтеш ауылы халҡы "Әүлиә шишмәһен" тәртипкә килтерҙе
Хәйбулла районының Йәнтеш ауылы халҡы "Әүлиә шишмәһен" тәртипкә килтерҙе Борон-борондан кешеләр һыу сығанаҡтарын күҙ ҡараһылай һаҡлаған. Ҡоҙоҡ ҡаҙып һыу сығарған, уны таҙалап торған кешенең исемен ошо ҡоҙоҡҡа ҡушҡандар, уны ихтирам иткәндәр. Тәбиғәттең баһалап бөткөһөҙ байлығы иҫәпләнгән һыу хаҡында эпостарҙа ла һыуға һаҡсыл ҡараш хаҡында әйтелә. Бөтә төр диндә лә һыу ҡойоноу, йыуыныу ритуалдарҙың айырылып алғыһыҙ бер өлөшө булған. Хатта килен төшөргәндә һыу юлын башлау, йәғни йәш киленгә һыу юлын күрһәтеү йолаһы әлеге көндә лә һаҡланып ҡалған. Шишмәләрҙе һаҡлау – ул киләһе быуынға ла һауалағы сафлыҡты, тәбиғәттең йәнле моңон ҡалдырыу тигән һүҙ. Районыбыҙ ауылдары һәр ҡайһыһы йылға буйҙарын төйәк иткән, ә йылғаларҙы иһә күп һанлы шишмәләр тулыландырып ҡына тора. Һуңғы йылдарҙағы ҡоролоҡтар һыуҙарҙың кимәлен бер аҙ кәметте, хатта ҡайһы бер шишмәләр ҡороу сигендә тип әйтергә лә була. Ауыл халҡы һыу сығанаҡтарын һаҡлап ҡалыу маҡсатында ҙур эштәр күрһәтә, йыл да ҡарҙар иреү менән шишмә-йылға буйҙары таҙартыла Йәнтеш ауылында ошо изге эшкә ауылдаштар йыйылып, шишмәне уратып алдылар һәм тирә яғында өмә үткәрҙеләр. Төҙөкләндереү эшендә ауыл халҡы, йәмәғәтселек ҡатнашыуы мөһим. Шишмә хәҙер тағы ла йәнләнеп киткәндәй тойола. Боронғолар: "Бер ағас ултыртһаң – ун йылға бәхет, бер шишмә асһаң – быуаттарға именлек" – тип юҡҡа әйтмәгәндер. Шулай булғас, һәр урамда, һәр ауылда үҙебеҙҙең шишмәләрҙе ҡәҙерләп ҡарау, уратып алыу, таҙартып тороу – беҙҙең бурыс. Шишмәләр сылтырап аҡҡан һайын сауаптары барып торһон, - ти йәнтештәр. #айыҡауыл