Россия Федерациясендә Гаилә, мәхәббәт һәм тугрылык көнен уздыруны оештыру комитеты "Мәх... — 7 июля 2026 г. в 11:25:20.012
Россия Федерациясендә Гаилә, мәхәббәт һәм тугрылык көнен уздыруны оештыру комитеты "Мәхәббәт һәм тугрылык өчен" дип аталган медаль булдырды. Медаль турындагы нигезләмә буенча, никахларын кимендә 25 ел элек теркәткән, бер-берсен яратуга, тугрылыкка корылган гаиләләренең ныклыгы белән танылган, уртак хезмәт нәтиҗәсендә муллыкка ирешкән, балаларын җәмгыятьнең лаеклы әгъзалары итеп тәрбияләгән ир һәм хатын бүләкләнә. 2008 елдан башлап, районыбызда «Мәхәббәт һәм тугрылык өчен» медаленә 18 гаилә лаек булды. Быел бу медальга Балтач бистәсендә гомер кичерүче, 60 ел кулга-кул тотынып яшәүче һәм бриллиант туйларын билгеләп үтүче Асия Гыйниятулла кызы һәм Гарифҗан Садыйк улы Мөхәммәтшиннар лаек булды! Мөхәммәтшиннар гаиләсенә медальне район башлыгы Рамил Рәшит улы Нотфуллин тапшырды. 📄 Гарифҗан Мөхәммәтшин 1941 елның 12 октябрендә Балтачта туа. Татар шагыйре, тәрҗемәче, Татарстанның атказанган мәдәният хезмәткәре, СССР Язучылар берлеге, Татарстан Язучылар берлеге әгъзасы. Саҗидә Сөләйманова премиясе лауреаты. Туган ягыбыз үсешенә саллы өлеш керткән, намуслы хезмәте өчен күп кенә мактау грамоталарына ия шәхес. 📄Асия Гыйниятулла кызы гомер буе Балтачта санитар-эпидемиологик станциядә фельдшер булып тырыш хезмәт куя. Эшләү дәверендә күп тапкырлар мактау кәгазьләре, грамоталарга лаек була. Асия ханым һәм Гарифҗан ага үзләре кебек тырыш, эш сөючән 3 бала тәрбияләп үстерәләр. Бүгенге көндә 6 онык һәм 2 оныкчыкның уңышларына сөенеп яшиләр.