Нәфисә Хәйруллина: "Язмыш сынаулары мине көчле иткән, күрәсең"
Нәфисә Хәйруллина: "Язмыш сынаулары мине көчле иткән, күрәсең" Нәфисә Хәйруллинаны күпләр Камал театрындагы спектакльләр, татарча сериаллар, фильмнар аша хәтерлидер. Аны Россиянең атказанган, Татарстанның халык артисты Фирдәвес Хәйруллина кызы буларак та беләләр. Нәфисә 10 ел элек кияүгә чыгып Мәскәүгә яшәргә күченгән иде һәм менә көтелмәгән күңелле яңалык - ул кабат сәхнәдә, Кәрим Тинчурин исемендәге татар дәүләт драма һәм комедия театрында "Лу" премьерасында төп рольне башкарды. Дөрес, бөтенләйгә кайтуы түгел икән. Репетиция, спектакльләргә кайтып- китеп кенә йөриячәк. - Ирегез танылган теле-кинопродюсер Рубен Дишдишян. Аның белән ничек таныштыгыз? -Рубен белән “Алтын Урда” сериалын төшергәндә якыннан аралашып киттек. Аның әнисе татар, ул тумышы белән Казаннан. Шәхси тормышым хакында сөйләмәскә тырышам, ирем, балам белән төшкән фотоларны да социаль челтәрләргә куймыйм. Бәхет тынычлык ярата диләр бит. Теләсә кайсы ир дә хатынының гаилә җанлы булуын телидер. Үземне күбрәк иремә, балама багышлыйсым килде. Хәзер улым кечкенә түгел инде, иҗатым турында уйларга да була. Иремнән рольләр сорамыйм. Ә Мәскәүдә рольләр тәкьдим итүчеләр булды. Тик әлегә миңа туры килгәне юк. Ирем миңа һәрчак Казаннан аерылма дип әйтә килде. "Анда сине яраталар, беләләр, хөрмәт итәләр", ди. Сәхнәгә кайтуымны да уңай кабул итте. -Улыгыз турында да әйтеп китегез әле, татарча аңлыймы? -Улыбыз Даниэль башлангыч сыйныфта укый. Велоспорт белән шөгыльләнә. Иҗатка сәләт геннардан күчә, күрәсең. Даня да театр, кино белән кызыксына. Прожекторларның ничек януына кадәр күзәтә, гримерка бүлмәсендә ниләр барын сораша. Ул телләрне бик тиз үзләштерә. Инглизчә сөйләшә, татарчаны да өйрәт ди. Аңа туган телемдә җырлар көйлим. -Әниегез танылган актриса Фирдәвес Хәйруллина бик яшьли вафат булды. 15 яшьтән ятим калдыгыз. Төшкә еш керәме? -Әгәр мәрхүм төшкә сирәк керсә, димәк синең тормышың өчен тыныч дигәнне ишеткәнем бар. Әни төшкә бик керми. Аның өчен гел дога кылам. Ул мине кечкенәдән мөстәкыйльлеккә өйрәтте, беркайчан якламады. Мәктәп җыелышларына да йөргәне булмады. Күп мәсьәләләрне үземә хәл итәргә туры килә иде. Аның ач тамагың, тыныч колагың, сиңа таш белән атсалар да, аш белән ат, дигән сүзләре әле дә истә. Әни вафатыннан соң аның сеңлесе Мәйсәрә апа белән үстем. Кызганыч, ул да арабыздан иртә китеп барды. Яшьли ятим калу, язмыш сынаулары мине көчле иткән, күрәсең. Эльвира Мозаффарова. Тулырак "Ирек мәйданы" газетасында.