Марстонь вийса тисть ваймама уженя — 20 июня 2026 г. в 17:00:03.964
Марстонь вийса тисть ваймама уженя Дракинась—оцю мокшень веле Торбеевскяй районца, кона эряй эсь коензон-обуцянзон коряс. Тяса фалу почётсот трудонь кельгомась, фкя-фкянь мархта ладямась, фкя-фкянди лездомась. Тя велеса эряйхне, тяса шачфне-касфне пяк лац шарьхкодьсазь самообложениянь программать. И вов результатсь—нинге фкя велень прудсь аф азовомшка полафтсь. Цифратне корхтайхть эсь инксост. 2024 кизоня программань участникне кочкасть 1339000 цалковай ярмак. Республикась кирдезе ширеснон, макссь нинге 5356000 цалковай. Марса лиссь 6695000 цалковай. А сембось ушедсь А.А.Кузнецовонь и А.В.Киселёвонь эзда. А тевонь тиема кярьмодсь Зубово-Полянань «Строитель» ООО-сь. Тяни велень прудсь шачсь, мярьгат, одукс. Урядаф, келептьф. Эвондась идень площадка, спортивнай комплекс нюрям мархта. Таргасть волейболса налхкомань сетка. А мзяра лия цебярь полафткста тиевсь. Ванат сембонь лангс и кенярди седице. Сембось тяса отвечай пингть вешфксонзон лангс. Ваймяйхне аньцек шнама валхт азонкшнихть республикань Оцюнять А.А.Здуновонь, райононь главать С.Ф.Шичкинонь и сембонь сятнень лемс, кие ушедозе тя тевть, путсь аф кржа вий прудть одкстоптомаса.