Озафтсть лятфнемань аллея — 9 июля 2026 г. в 16:52:00.635
Озафтсть лятфнемань аллея С.В.Катковонь лемса Республиканскяй клиническяй больницять территорияса озафтфоль каштанонь аллея, кона лемтьфоль боевой действиянь ветеранонь Шити. Лятфнемань аллеять озафтомаса лездсь «Единая Россия» партиясь историческяй мялямть ванфтоманц коряс партийнай проектть вельде. «Минь кочкавоме тяза, штоба лятфтамс аралаеньконь, конат ваймонь мекольце таргамати ульсть вернайхть эсь Отечестваснонды. Синь максозь эряфснон сетьме менельть инкса, сянкса, штоба врагсь афоль шятя моданьконь лангс. Родинати кельгомаснон лангс ванозь касфтови од поколениясь. Минь долгоньке—ванфтомс ня геройхнень колга мялямть», – корхтасть церемониянь аноклайхне-ётафтыхне. Отечествань шавф аралайхнень колга мялямонь ванфтоманска азфоль минута кашт аф молезь ащема. Мордовиянь Оцюнять Артём Здуновонь лемста церемониянь участникненди пшкядсь Мордовиянь здравоохранениянь министрсь Олег Маркин: «Тячи минь сюконязь лятфнесаськ воит- тнень, конат эсь эряфснон питнеса аралакшнесамазь минь, иденьконь, странаньконь. Регионцтонк медицинскяй работникне васенцетнень ётксот, кит макссихть медицинскяй лезкс воиноньконди и од территориянь мирнай эряйхненди. Враченьке якайхть Херсонскяй областень Каланчакскяй округу. И тяса, Мордовияса, тейнек эряви тиемс семботь, штоба специальнай военнай операциянь участникненди, боевой действиянь ветераттненди и синь мала ломаньцнонды макссеволь сембе эрявикс медицинскяй лезкссь». «Од аллеяса эрь шуфтсь—боевой действиянь ветераттненди сюконямань эрек символ,—отмечазе Саранск ошень округонь Ленинскяй райононь администрациянь оцюнясь, «Единая Россия» партиять Ленинскяй местнай отделениянц секретарец Владимир Пряхин.—Озафтф шуфттне кармайхть кемокснема и касома, лятфнемок героеньконь подвигснон колга!» «Аллеять путомац—эрявикс мяль-арьсема,—мярьгсь МР-ть коряс РФ-нь Следственнай комитетть Следственнай управлениянц руководителенц лездыец Наталья Афанасьева.—Минь марстонь задачаньке–ванфтомс Родинань аралайхнень колга мялямть». Сюконяма вал мархта минь аралаеньконди, боевой действиянь ветераттненди пшкядсь Саранск ошень округть коряс Россиянь УМВД-нь общественнай порядкать ванфтоманц коряс полициянь начальникть заместителенц тевонзон тиендисна Павел Гущин. «Тя аллеясь—минь марстонь мялямоньконь символоц. Шавфнень инкса пичедемань символ, но тяка пингть – боевой ялгаксшинь и врачненди, конат араласазь ранендаф воиттнень эряфснон, сюконямань символ»,—пшкядсь пуромфненди боевой действиянь ветеранць Александр Асманов. Кода азозе С.В.Катковонь лемса Республиканскяй клиническяй больницять главнай врачец Алексей Алагулов, тячиень шити тя больницяса пчксесь ни специальнай военнай операциянь 150-да лама участник и 500-да лама ломань синь семьястост. Родинань аралайхть улихть и больницянь врачнень ёткса: тяни эсонза работайхть боевой действиянь 9 ветератт.