Велень асу мокшава — 20 июня 2026 г. в 16:47:00.480
Велень асу мокшава Ня шитнень эсь 65 шачема шинц отмечазе Атюрьевскяй райононь Пичепулоня велень эряйсь, велень хозяйствань ветеранць, кота идень тядясь Л.С.Мустайкина. Сонь ялганза кунара ни ваймосихть. Ваймама валсь ёфси аф ладяй Лидия Сергеевнанди. Афи содасы, мезе тя тяфтамсь. Ушедсаськ сянь эзда, што Лидия Сергеевна тянемс трудендай «Каменка» МАПО-са дояркакс. Тевсь пяк стака, ответственнай. Аш ваймама шит, аш праздникт. Эрь шиня траксне потямат. И трудонь кельги мокшавась эрь шобдавать эряскоды Оцю Шуструй вели. Тевонц тиендьсы совестьс коре. Аф стак хозяйствань оцюнятне корхнихть колганза аньцек шнамань валса. Лятфтасаськ эсь хозяйстванц. Тяддевок путсь оцю пере. Кодама аньцек перень сёрот аф касфты перенясонза. А синь мельгаст ванома. Сор тишетне урядамат, путфксне валондомат. А мзяра лия тевда. И сембонь мокшавась вятьсыне ськамонза. А кинь мархта ина? Мирдец, Никифор Киреевич, сидеста сяряди, машни эсь лангозонза. Кодама эздонза лезды. Эсь прянц пичефтельхце, сявок пара. Ату сонга нинге ваннема. Эряйхть вирть крайса. Туй пангонь, кстынь, пчкафты тишень сезонць. Аф кирдеви кудса трудонь кельги мокшавась. Велень аватнень мархта якай виривок. Кочкси и панкт, и кстыхть. И аф аньцек эстеенза, но и мишендемска. Мзярда сембонь кенерькшни тиемс?