Мошенникне киньге аф ужяльдихть — 26 июня 2026 г. в 14:30:02.870
Мошенникне киньге аф ужяльдихть Мошенникнень колга корхнетяма «Мокшень правдать» эрь номерсонза. Азонттама сянь колга, кода аф повомс синь килькшезост. Финцне кулхцондсамазь, старандайхть ётамс ня аеркс ломаттнень вакска. А улихть и тяфтапт, конат эсь воля макссесазь, прважсесазь аф содаф ломаттненди эсь ярмакснон. Аферисттне киньге аф ужяльдихть. Тяни педсть эряфкшу ломаттненди, конат получайхть пенсия, кочкайхть ярмаконя калмафтомс. Аферисттне азонкшнесазь пряснон и Социальнай фондонь, и аф государственнай пенсионнай фондонь сотрудникокс. Эряскофтыхть, вешихть лия счётс ярмаконь ётафтома. Тянь лангс шарфтсь мяль Российскяй Федерациянь Государственнай Думась. Кода тянь эзда аралама пря? Проверясть, васендакиге, информациять. Тяда эряскода ётафтомс ярмаконтень кати-кинди и кати-мезенди. Афкуксонь фондонь сотрудникне мзярдовок аф вешихть ярмаконь ётафтома, стак ащемда аф гайфтихть телефонца. Мзярдовок тясть азонкшне телефонца картантень, СНИЛС-тень номерснон, СМС-нь кодть. Эстокиге путость трубкать. Кие ба афоль гайфте, кие ба афоль кизефте карта, СНИЛС, эстокиге путость трубкать. Тяфта тинь ванфтсасть и ярмаконтень, и шумбрашинтень.