Касфтсь ниле цёрат-богатырьхть — 26 июня 2026 г. в 13:42:00.950
Касфтсь ниле цёрат-богатырьхть А.П.Неяскинать Атерь велеса содасазь сембе. Тя трудонь кельги мокшавась касфтсь ниле цёрат-богатырьхть. Сембонди макссь аф кальдяв воспитания, образования. Ниле цёранзон эзда аньцек фкять аш высшай образованияц. Аш, кле, тядяй, мялезе вузса тонафнемс. Сяда пара кармай, кда муян эстейне покодема васта. Сонга эряй-ащи ломань, трудонь кельги мокшаля. Вахтань методса якай Москуву добувама. Аф кунара Атери рамась куд. Эзонза тись ремонт, оцю пристрой. И сонць кудсь, и перьфоц, мярьгат, эрекласть. —Сергей цёразень зрняннет кяденза,—корхтай Анна Прокопьевна.—Кона тевти аф кярьмоди, кядьсонза эреклай. И плотник, и строитель, и сантехник. Кие ина, кда аф сонць, тисыне кудонь тевонзон. Минь аф лездофтама, мирдезень мархта сиренятама. Сяс сави надиямс аньцек эсь лангозонза. Аф аньцек Сергей, а сембе Анна Прокопьевнань тяфтапт иденза. Алексей, Пётр, Евгений эряйхть Москуса, высшай образованиясна, семьясна, цебярь покодема вастсна. А сайхть вели, лангозост ванозь седице кенярди. И пере сокайхть, и тише лядихть, и переня перяйхть. Кона тевти аф кярьмодихть, тисазь. Коста сембонь маштсазь. Тонафнесть школаса. Ашесть кенере аделамс школаснон, тусть ошу высшай образованиянь получама. Вузда меле тага ошсот. А сайхть вели, мярьгат, ковга и ашесть тушенда. Синь инксост Анна Прокопьевнань кенярди седиец. Тяфтапт и уноконзовок. Мянь вейхкса эздост. Оцюфненди ни 26, 23 киза. Алят ни. Синьге кельгсазь трудть. Родительхне тонафтсазь велеть кельгома. —Хуш и шачсть-кассть ошса,—поладозе Анна Прокопьевна,—а эсь юрсна эрявихть содамс. А монь уноконень юрсна Атерьсот. И пяк пара, што синь тянь шарьхкодьсазь. Шачсь Анна Прокопьевна 1958 кизоня Атерь велеса Девятаефнень оцю и трудонь кельги семьясост. Тядяц, Ольга Ефимовна, покодсь разнорабочайкс строительнай организацияса. Аляц, Прокопий Яковлевич, трактористоль, водителель. Аф тёждяль алянц эряфоц, каворксуволь. Аляц, Яков Иванович, эрясь козяняста. Колхозу ашезь сува. Панезь семьяснон Сибири. Великай Отечественнай войнать васьфтезь Сибирьса. Яков Иванович тусь Родинаньконь арлама. Меки куду ашезь мрда. Рьвац, Елена Григорьевна, мрдась Атери, ськамонза касфтозень эсь идензон. Сембе синь арасть цебярь ломанькс. Анна Прокопьевна Лена бабанц лятфнесы пяк сидеста, шнашендсы. Колганза азонкшни эсь идензонды, уноконзонды. Тядянц мархта аляцка шачфтсть мянь кафкса итть. Сембе синь цебярь ломатть. Анна Прокопьевнавок аф кальдявста аделазе Атерь велень 1№ средняй школать. Тонафнесь швеянди Рязанскяй областьса. Колма кизот техникумонь аделамда меле покодсь тяка жа областьса. Меле трудендась Атерень районнай бытонь кудса. Кафкса кизот каннесь почта. Комсь киза работась санитаркакс районнай больницяса. Коса ашезь покотькшне, эрь вастса колганза азонкшнесть аньцек шнамань валхт. Трудоц отмечсевсь казнеса. Анна Прокопьевнань васенце мирдец, Алексей Павлович Адышкин, кулось 28 кизоса. Сон покодсь трактористокс «Память Ильича» колхозса. Мокшалясь кадсь эсь мельганза касфтомс Анна Прокопьевнанди колма цёрат. Лиссь рьвакс омбоцеда. А.Ф.Неяскинонь мархта шачсь нинге фкя цёрасна. Марсот ни 35 киза. Тяфта ладязь, фкя-фкянь шарьхкодезь и эряйхть. А.П.Неяскина Девятаефнень семьяса инь оцюсь. Тяни лятф тядя вастс. Примасыне сембе брадонзон, сазоронзон. Сонь кудоц сембонди сувама васта. Ульсь пинге, пирьфсна пяшксель жуватада, путнесть оцю пере. Пере путнихть тянивок, но мельганза якамась арси аф тёждя тевкс. —Кизотне молихть, минь сиреттяма,—корхтай мокшавась.—Но сембе сяка, сельмось няи. Пчкясь кати-мезе тиелеть, но вийхне аф сят. А.П.Неяскина—ару вайме, панжада седи ломань. И тянь мархта азф сембось. Илья Вешкин.