Велеса шнама мокшава — 10 июля 2026 г. в 13:56:03.151
Велеса шнама мокшава А.В.Мурзайкинать Атюрьевскяй райононь Крхтаж велеса содасазь однек-сиренек. Трудонь кельги мокшавась аньцек тястонь средняй общеобразовательнай школати макссь колмогемоньда лама киза. Сон аф тонафтыель, а простой техничкаль. Штась-урядась, ванць порядкать мельге. Но коллективса ульсь шнама и кельгома ломанькс. Иттне сонь лемнезь Настакакс, тонафтыхне и мархтонза покодихне—Анастасия Васильевнакс. Школань директорсь Н.И.Бурнашкин лац содазе, кда школаса покодись Мурзайкинась, то фалу аруши и порядка. А лиякс мокшавась ашезь машта работама. Кона тевти афоль кярьмоде, тиендезе маштозь и совестьс коре. Тядде Анастасия Васильевнань кафта юбилеенза. Сизьгемонь эстеенза и топодсь 50 киза, кода эряйхть марса кельгома мирденц, Василий Михайловичень, мархта. Бта сембось ульсь исяк, а мзяра марса ётаф. Василий Михайловичень профессияц аф тёждятнень эздоль. И трактористоль, и комбайнёроль. Тялонда сяда ламоль шава пингтонза. А вов кизонда шинь-шинь юмсель паксяв. И паксят сокась, и сёра видесь, и нусь-тялясь касфтф урожайть эса. Анастасия Васильевна шарьхкотькшнезе сонь. Мушендсь пинге и мирденцты, и идензонга вестевок школав ашезень прважсе вачеда, рдазу щамса. Кизотне аф молихть, а лиезь-лиихть, мельгаст аф кенерят. Анастасия Васильевна шачсь Крхтаж велеса, Мурзайкиттнень трудонь кельги семьясост. Сяс, мзярда лиссь рьвакс, фамилияцка ашезь сав полафтомс. Родителенза, Василий Филиппович и Евдокия Никитовна, простой колхозниктольхть. Аляц «Рассвет» колхозса постуфоль, тядяц работакшнесь тинголангса. Семьясост гордостекс и прянь шнафтома вастокс ульсь атяц, Великай Отечественнай войнань ветеранць Филипп Мурзайкин. Сон сась войнаста куду пильгфтома. Но сембоса сафнезе, ульсь и велеса, и семьяса честень путома ломанькс. Настя Мурзайкинась аделазе Крхтажень школать и тусь тонафнема швеякс Рузаевкань профессионально-техническяй училищав. Сонь аделамдонза меле стась щапт велеряйхненди васенда Темникавонь, тоса Атерень бытонь кудса. Меле стамань цех панчсть и Крхтажу. Тоса пуроптсь семья. Трудонь кельги стирть мельге кучсь кудат Василий Михайлович. Налхксть свадьба. И вов ни ведьгемонь киза марсот. Свадьбада меле Анастасия Васильевна кармась покодема школаса техничкакс, а Василий Михайлович пцтай ведьгемонь киза трудендась механизаторкс «Рассвет», «Искра» колхоснень, В.И.Симайкинонь крестьянско-фермерскяй хозяйстванц эса. Фалу ульсь передовой механизаторкс, социалистическяй пялькстомаса сяськикс, пятилеткань ударникокс. Касфтсть Мурзайкиттне колма итть. Сембе шнама, эряй-ащи ломатть. Ольга Москуса аделась вуз, покоди столицань школаса. Елена вов ни комозьда лама киза покоди столицань банкса. Алексей тожа эряй Москуса, заняф строямань тевса. Касыхть вете уноксна. Ульсь пинге, мзярда Мурзайкиттнень пирьфсна пяшксель жуватада. Кирдсть тракст, букат, тувот, куднармотть. Путнесть кафтонь пере. Тянивок тевфтома аф лядондыхть. Кизотне аф сят, шумбрашисновок лафчемсь. Но сяка путнихть пере, касфнихть перень сёрот. Кирдихть жувататка. Кода ина лиякс. Велень ломанти тевфтома эрямс апак тонатт. Мекольдень кизотнень Мурзайкиттне эряйхть кафонест. Но юкстаф ломанькс синь ашельхть мзярдовок. Кудсна фалу пяшксе ошень инжида. Сидеста сашендыхть идьсна, овсна, рьвянясна. Сембе каникуласнон тяса ётафнесазь и уноксна. А кода ина лиякс. Коса ба ломанць афоль эря, а шачема-касома уженяда питни мезевок аш. —Пяк пара, што идне кельгсазь Крхтажть, сашендыхть сидеста варжамонк,—корхтай Анастасия Васильевна.—А кафксть пара, што тонафтсазь велень эряфть кельгома эсь идьснонга. Шабатненди эряви содамс, коса шачсть и кассть родительсна, костоннет синь юрсна, китольхть атясна-бабасна. Илья Вешкин.