Степан Эрьзянди панжеви выставка — 11 июня 2026 г. в 14:18:00.634
Степан Эрьзянди панжеви выставка Июнь ковонь кефкиеце шиста Советскяй ульцянь 29№ кудть выставкань залсонза панжеви «ЭРЬЗЯ-АРТ. Степан Эрьзянь 150 кизонь топодеманцты выставочнай проект» международнай выставка. Выставкать аноклазе Мордовия Республикань художниконь Союзсь С.Д. Эрьзянь лемса Мордовскяй республиканскяй изобразительнай искусствань музейть лезксонц вельде. Сон ащи полатксокс «АРТ-Фреш» республиканскяй проектти, кона ётафневсь Мордовияса 2018 кизоста сявомок. Выставкать од форматоц шарфты мяль тяниень пингонь художественнай процессть и XX веконь искусствать ёткса соткснень лангс, конат кирдевихть скульпторть Степан Эрьзянь лемонц вельде. Экспозицияти сувсихть аф аньцек тяниень пингонь авторхнень работасна, но и музейнай фондста произведениятне, мезсь корхтай художественнай койхнень сяда тов молемаснон колга. Декоративно-прикладной и изобразительнай искусствань произведениятнень мархта ряц няфтьфт мультимедийнай покодемат, конатнень вельде одкстоптови ванфсь мастерть творчестванц лангс. Выставочнай кафта залхнень эса няфтьф 200 малава произведения. Советскяй ульцянь, 29№ кудса экспозициять эса улихть скульптурат и живописнай полотнат, конат лемтьфт Эрьзянди и сонь работанзонды. Экспозициясь пяшкотьф произведенияса, конат панчсесазь шачема масторонь, сокаень-видиень эряфонь-ащефонь, национальнай коень-обуцянь тематнень. Медиа-артти башка васта максови музейть Главнай зданиясонза Коммунистическяй ульцянь 61№ кудса. Залса няфневихть фотографият, видеот, анимацият, конатнень вельде одукс ванови Эрьзянь творческяй методоц. Авторхнень ёткса улихть Саранск, Санкт-Петербург, Омск, Владимир, Нижняй Новгород ошнень эзда художникт. Выставкась козя искусствань эрь кодама видса, художественнай образса и творческяй арьсемань вийса. Сянкса сон туй мяльс и од, и сяда эряфкшу ломаттненди. Выставкась кармай покодема июль ковонь 5 шити самс.