Крхтаж велеса оцю ила — 18 июля 2026 г. в 11:45:01.171
Крхтаж велеса оцю ила Атюрьевскяй райононь Крхтаж велесь содаф мокшэрзянь крайса эсь трудонь кельги ломанензон марх- та. Тястонь ломаттне виень аф ужяльдезь трудендасть «Рассвет» и «Искра» колхоснень эса, средняй школаса, клубса, библиотекаса, фельдшерско-акушерскяй пунктса. Гордостекс, прянь шнафтомань ломанькс ащихть велень хозяйствань ветераттне В.В.Резяпкин, Б.М.Петяйкин, М.М.Яшкин, Л.М.Мурзайкина, педагогическяй трудонь ветераттне Н.И.Сургаева, Т.М.Мелёшкина, И.П.Бурнашкина, Н.И.Бурнашкин, лиятне. Аф кунара ульсь Крхтаж велеть илац, коса лама корхтасть историять, койнь-обуцянь ванфтомать колга. Петемда меле Крхтаж велеса панжезь и клубть. Велень поселениянь оцюнясь В.И.Сунгаев лама шнама валда азсь сятнень лемс, кит лездсть тя эрявикс тевса. Тя райононь оцюнянь тевонь тиендись Е.В.Круглова, лиятне. Поздравляндазень велеряйхнень и илать, и клубонь панжемать мархта Мордовия Республикань Госсобраниянь депутатсь Т.М.Волкова. Сон лятфтазе, што Крхтажсь мокшень оцю веле. Сонь юронза туйхть шаржу пинкненди. Тяса фалу эрясть и тянивок эряйхть трудонь кельги, сталмода аф пели ломатть. Мокшэрзянь крайса лац содафтольхть лемсна Р.Р.Порваткинонь, Е.И.Мустайкинонь, В.М.Алёшкинонь, Н.К.Аверкинонь, П.Н.Левановонь, И.И.Левановонь и лиятнень. Синь лемсна оцю букваса сёрматфт велеть, районть историяс. Кеподезень велеряйхнень мяльснон концертсь, спортивнай пялькстоматне, ару кожфса налхксематне. Морасть илас сафненди Надежда Леванова, Татьяна Акимкина, Мария Алямкина, Евгений Шумкин, Николай Пугаев, ламотне лиятне. —Тяфтама илат эрявихть ётафнемс сяда сиденяста,—корхтай Крхтаж велень мокшалясь Ю.А.Ямщиков.—Кулхцондоме мокшень мазы морот, седикс-ваймокс корхнеме фкя-фкянь мархта, примаме участия налхкоматнень эса. Содатама кудонь, перень тефт. А тя илась маласькофнесыне ломаттнень, лихтьсыне кудстост, явоштсыне тевснон эзда. Мон кафта кядьса тянь инкса. Илат Крхтажса ётафнихть сидеста. Пуромкшнихть и ломаттьке. А кизонда велеса нинге лама инжида. Синь сафт Москуста, Питерста, Самараста, лия ошста. —Мзярда шачема-касома велесот ила, кенярди седице,—корхтай А.П.Мурзайкина.—Велеса эрязь тя аф сяшкава няеви, а ошса лажадат ня илатненди. И пяк пара, што синь ётафневихть, пуропнихть лама ломань.