Кода мошенникне васькафнесазь пенсионерхнень — 24 июля 2026 г. в 16:22:00.819
Кода мошенникне васькафнесазь пенсионерхнень Ламоц пенсионерхнень эзда верондайхть сятненди, кит азондсазь пряснон полициянь, соцзащитань, поликлинкань государственнай организациянь сотрудникокс. Сятненди, кит азондыхть сиренятненди од льготатнень и субсидиятнень колга. Сявомок тянь мяльс, аферисттне арьсекшнихть од схемат, конат ладяйхть пенсионерхненди. «Эряви тиемс пенсиязт прибавка»—тя инь сидеста васьфневи васькафнематнень эзда фкясь. Мошенниксь гайфни бта Россиянь Социальнай фондста (СФР) и пачфни эряфкшу ломанти, што мувсь аф лувф трудовой стажец. Кда максомс заявка одукс лувоманкса, ули кода получамс пенсияти эрь ковонь прибавка и ётай кизонь компенсация. Соцфондонь аф видексонь сотрудниксь азсы, што оформлениянди козонга аф эряви молемс. Сатомшка азомс банковскяй картать реквизитонзон и азомс кодть, кона сай телефонти бта заявкать кемокстаманкса. Но кда пенсионерсь семботь азсы аферисттненди, то панчсы теест кить эсь ярмаконзонды. Мошенникненди ули кода повомс сонь личнай кабинетозонза банкть сайтса и ароптомс счетть. СФР-нь сотрудникне мзярдовок аф гайфнихть ломаттненди, штоба лувомс пенсиять или максомс ярмакнень. Синь аф кизефнесазь телефонть вельде картатнень даннайснон. Соцфондонь сотрудникненди ули кода анамс документт или содамс ярмаконь ётафтомс реквизиттнень, аньцек эста, кда тинць сатада отделенияв. Секретнай кодть номеронц синь аф анцесазь. Мзярда кивок кизефнесыне тинь персональнай даннаентень, картать реквизитонзон или банковскяй кодонтень, эряви эстокиге лоткафтомс корхтамать. Пенсиянтень колга эрь кодама информациять эряви оду проверямс МФЦ-ть вельде или СФР-ть маластонь отделениясонза. Стане жа ули кода максомс кизефкст Соцфондть шинек-венек работай линиянц номеронц коряс: 8 800 100-00-01.