Площадьса ётась зарядка — 20 августа 2026 г. в 12:00:07.677
Площадьса ётась зарядка 14 августста, Саранскяйса, Тысячалетиянь Площадьса, ётафтовсь зарядка. 8:00 частса ни тяса ламоль ни ошеряйда, конат аноктольхть ушедомс эсь шиснон зарядкаста. Лятфтасаськ, што проектонь ушедыкс арась Мордовиянь Оцюнясь Артём Здунов. Шобдавань гимнастикань главнай тренеркс ульсь Наталья Суворова–ВМХ-нь велоспортть коряс международнай классонь спортонь мастерсь, Олимпийскяй налхкомань участницась и Россиянь ветень-крдань чемпионкась. Ёфси аф кунара спортсменкась получась од статус—арась тядякс. Сонь цёранцты, Фёдоронди, нинге ашезь топоде ков, сембе сяка, Наталья старандай аф лядомс тяфтама илатнень эзда. Эрь шобдаваня семьянц мархта тиенди упражненият. Мероприятияса примасть участия отечественнай велоспортонь тяшттне. Синь ётксост—Россиянь велоспортонь Федерациянь васенце вице-президентсь, колмоксть олимпийскяй чемпионць Вячеслав Екимов, а стане жа Россиянь сборнай командань спортивнай анокламань Центрать директороц, Мужествань орденонь кавалерсь Роман Гришин. Вячеслав Екимов макссь оцю питне тя ушетксти и азсь мяль проектть келептеманц инкса. Улель пяк пара, кда тяфтама занятиятне ётафневольхть эрь шобдаваня. Площадкати стане жа састь и СВО-нь ветераттне: Олег Филиппов—профессиональнай спортсменць, Кирилл Левкин—медиксь. Синь ни содасазь шумбра эряфть-ащефть. Эрь шобдавасна кафцьконь ушеткшнихть зарядкаста. МР-ньспортонь министрсь Никита Ларьков и Саранск ошень мэрсь Владимир Быков полафтозь пиджакснон спортивнай костюпнень лангс. Отькорьхть, весялат, пяшксет эрьгада ласьксть зарядкас рабочай шида инголе. «Эрь шобдавась эряви ушеткшнемс зарядкаста и цебярь настроениясь ули шиньберьф!»—виденцясь ошень мэрсь Владимир Быков. МР-нь спортонь министрти Никита Ларьковонди ушесь няевсь ёфси аф кельмокс. Сон ломанць кельме ширде, Архангельскяйста, и тяфтама ушесь мялезонза.