Мордовияса ётась Россиянь Чемпионат — 20 августа 2026 г. в 10:38:00.051
Мордовияса ётась Россиянь Чемпионат 3 августста сявомок 16 августти молемс Мордовияса ётафтовсь Bmx-гонкатнень коряс Россиянь Чемпионат и Первенства. Республиказонк сась вете сядода лама инь вии райдер странать кефкие регионцта. Мордовиять няфтезь велоспортть коряс региональнай школань воспитанникне: Александр Катышев, Светлана Баринова, Владислав Неяскин, Дмитрий Росланкин, Дарья Хлуднева, Илья Мошков, Роман Каплин, Никита Котельников и Оксана Каракулина. 14 августста ётафтовсь Чемпионатть и Первенствать панжемань церемонияц. Спортсметтнень приветствовандазь МР-нь Оцюнясь Артём Здунов, Россиянь велоспортонь Федерациянь васенце вице-президентсь Вячеслав Екимов, МР-нь спортонь министрсь Никита Ларьков и Альфа-банконь региональнай отделениять управляющаец Светлана Башкова. «Кельгома ялгат, Мордовиянь эряйхне и инжихне, поздравляндатядязь Bmx-гонкатнень коряс Россиянь чемпионатть и первенствать ушедоманц мархта. Нилецеда ётафнесаськ ня оцю пялькстоматнень, и минь инфраструктураньке лезды ётафнемс синь оцю уровеньца»,–азозе МР-нь Оцюнясь Артём Здунов. Сон стане жа поздравляндазень од тядятнень-алятнень, мировой уровенень тяшттнень, Наталья Суворовать и Александр Катышевонь, цёраснон шачемаснон мархта. Синь цёраснонды, Фёдоронди, аш нинге ков, тядясна-алясна нинге тонаткшнихть од эряфти. Наталья Суворова корхтась, што пяк мялецоль примамс участия тя пялькстомаса, но шабань шачфтомда меле нинге ашезь кочка вийхть. Россиянь велоспортонь Федерациянь васенце вице-президентсь Вячеслав Екимов поладозе, што Мордовияса велоспортть коряс школась серьезнай. Сон макссь 60 беговелонди и шлемонди сертификат республикаса «Вело.Шабат» проектть улеманцты. «Саранскяйсь–велоспортть родинац, и аньцек тяса олимпийскяй уровенень ВМХ-рейсингонди фкя и тяка трассась. Сембонди арьсян сяськомат, сатфкст»,–мярьгсь Вячеслав Екимов. Россиянь сборнай командань спортивнай анокламань Центрать директороц Роман Гришин пачфтезе, што кота инь цебярь спортсметтне повихть странань сборнайти и кармайхть аноклама Олимпийскяй налхкоматненди. «Шумбрат, Мордовия! Минь ащетяма странаньконь инь цебярь объектса. Надиян, курок ётафтсаськ тяса миронь чемпионатть. Сюкпря командати и Мордовия Республикань Оцюняти ня оцю пялькстоматнень ётафтоманкса»,–мярьгсь Роман Гришин. Афкукс, «Супер-кросс» трассась пяк цебярь. Турнирть программац козяль. Медальхне налхковсть фкя пингста аф фкя дисциплинаса. Странань первенствань участникнень мархта састь и синь тядясна-алясна. Саранскяй трассати тя чемпионатсь–bmx региональнай школать оцю классонц кемокстамац и олимпийскяй сборнайти кадрань анокламаса оцю аськолкс. Турниронь лидерхне: Ярослава Бондаренко арась сисемксть Россиянь чемпионкакс, Илья Мошков сатсь зрнянь медаль индивидуальнай гонкаса и команднай эстафетаса, арамок странань нилень-крдань чемпионкс.