Туйхть эряма дикай природав — 14 августа 2026 г. в 18:00:04.617
Туйхть эряма дикай природав 1 августста Корчагинец прудса лиссь оцю события–тяса нолдасть 100 яксярга-кряква. Эрь кизонь «Яксяргонь территория» всероссийскяй акциять мяльса кирдезь, конань аноклазе Мордовиянь вирень, охотниконь хозяйствань и природопользованиянь Министерствась. Вов ни нилеце кизось мельцек республиканскяй эколокне и энтузиасттне пуромкшнихть, штоба мрдафтомс ведьге уенди нармоттнень перьфпяли. Прудть трвас пуромкшнесть аф аньцек велень хозяйствань представительхне, но и од эколокне, «Зелёный мир» организациянь активисттне и школьнай лесничествань од ломаттне. Сембе синь састь, штоба няемс цебярь событиять — яксяргонятнень мрдамаснон синь естественнай эряма вастозост. «Минь эрь кизоня полафнесаськ нолдамань васттнень, сяс марятама ломаттнень эзда пяк цебярь валхт. Цебярь мяльхть-арьсемат, мяляфтови фотографият–минь арьсетяма, што тя акциясь эряви поладомс»,–корхтай Мордовиянь вирень, охотниконь хозяйствань и природопользованиянь министрсь Адель Галиуллин. Пруду нолдаф яксяргонятне касфтфтольхть специализированнай хозяйстваса. Вольерть кадомда инголе синь ётасть карантин и биотехническяй аноклама, мезсь лезды теест тонадомс эряфти дикай природаса. Алина КИРДЯШОВА.