Республикань Оцюнясь Артём Здунов ульсь Краснослободскяй районца — 20 августа 2026 г. в 09:10:01.719
Республикань Оцюнясь Артём Здунов ульсь Краснослободскяй районца 15 августста Мордовия Республикань Оцюнясь А.А.Здунов рабочай визит мархта ульсь Краснослободскяй районца. Сон примась участия торжественнай илатнень эса, конат лемтьфтольхть Краснослободск ошть 456 кизонь топодеманцты. Ошень главнай площади пуромкшнесь лама ломаньда. Синь састь оцю илас аф аньцек Краснослободскяйста и райононь велетнень, но и странаньконь оцю ошензон, Саранскяйста, шабрань Атерень, Ковылкинань, Темникавонь, Сире Шайгавонь райоттнень эзда. Республикань Оцюнясь Артём Здунов поздравляндазень илас сафнень Краснослободск ошть шачема шинц мархта. Райононь кой-кона эряйхненди трудонь оцю сатфксонкса и лама киза цебярьста покодеманкса макссь государственнай казнет. Артём Алексеевич ульсь «Завод Промметизделий» ООО-са, ванозе од производственнай цехть, корхтась предприятиять показателензон колга. Сяда тов А.А.Здунов Краснослободскяй муниципальнай райононь оцюнять И.П.Волковонь мархта ульсть многопрофильнай лицейса. Корхтамась специалисттнень мархта мольсь объектть тонафнемань од кизоти максоманц колга. Торжественнай илатне Краснослободск ошса мольсть шоподемс. Ширеса ащихть ашельхть. Кштисть и морасть культурань кудонь артисттне. Кода маштыхть пидема-панема—тя пяк лац няевсь Колапань, Мокшень Паркань, Сире Синдрунь и лия велень поселениянь ярхцамбяль мархта аноклаф шраснон эзда.