БАҠСАЛА — 10 июня 2026 г. в 03:19:30.204
БАҠСАЛА Ҡый үләндәрен утайым, Баҫып бара түтәлде. Үҫентеләр көнгә баҡты – Бөгөнгә эш үтәлде. Шул ваҡытта үткер бер уй Мейегә килеп инде: “Ҡый үләндәй әҙәмдәр бар, Хәҙер беләһең инде!” Берәүҙәре кесерткәндәй Сағып алырға тора. Күңелеңде һыҙлатырға Төрлөсә мәкер ҡора. Була сырмалсыҡ һымаҡтар, Тын алырға ла бирмәй. Бер – алдыңда, бер – артыңда, “Ҡуй” тигәнде лә белмәй. Шайтан таяғы шикелле, Сәнскеле әҙәмдәр бар. Энәһен ҡаҙамайынса, Ундайҙарға донъя тар. Аҡтамыр булып тарала Берәүҙәрҙең ғәйбәте, Кәмселекте генә эҙләй, Күрә белмәй һәйбәтте. ...Ғәфү итегеҙ, үләндәр, – Уйлата әллә ниҙәр. Ҡайһы саҡта уйҙарыңдан Үҙеңдең күңел биҙер. Рәшиҙә Мәһәҙиева
358 просмотров