МЭТР телеканалын «Парым» фильмын премьерыже Морко районышто эртен.
МЭТР телеканалын «Парым» фильмын премьерыже Морко районышто эртен. Ушештарена, кугыжаныш телеканал да республикысе усталык шӱлышан еҥ-влак марий фильмым ыштеныт. Тудлан сценарийым «Марий Эл Радион» тӱҥ редакторжо Владимир Матвеев Валерий Апакаевын ойлымашыже-влак негызеш возен. Съёмко Морко районысо Унчышто эртаралтын, тушко лӱмлӧ артист-влак дене пырля верысе калык, фольклор коллектив-влак ушненыт. Фильмын режиссержо - Роман Алексеев. Роль-влакым Наталия Алексеева, Сергей Данилов, Светлана Строганова, Светлана Сандакова, тыгак самырык чолга рвезе-влак Богдан Тымбаршев, Артем Ягодаров чоҥеныт. Сем дене Григорий Архипов устан сылнештарен, тыгак монтажым ыштыше режиссер семын Федор Волконидин тыршен, оператор пашам Сергей Корнеев виктарен. Фильм тӱвыра министерствын полшымыжо дене ышталтын. Ынде тудын премьерыже Йошкар-Олаште лиеш, а тӱшка калык «Парым» фильмым МЭТР телеканалыште аклен кертеш.