Геройхне аф юкставихть мзярдовок — 13 июня 2026 г. в 11:52:00.380
Геройхне аф юкставихть мзярдовок Рузаевскяй райононь Сузгярьге велесь макссь мокшэрзянь крайти лама герой. Специальнай военнай операциять пингста шавовсть А.А.Ушаков, И.А.Дьяков, Н.А.Дорожкин, А.И.Дорожкин, А.С.Черкасов, лиятне. Синь и семьяснон колга мяляфтыхть велень поселенияса, Рузаевскяй райононь администрацияса. Фалу мяльса кирдьсыне Республикань Оцюнясь Артём Здунов. Лемозост ётафневихть илат. Панчсевихть мемориальнай лятфнемань доскат, «Героень партат». Ётафневихть Мужествань урокт, спортивнай пялькстомат. Кепотьксонди, аф кунара «Шиня» аф совершеннолетняйхнень социально-реабилитационнай центрасост ётафтовсь лятфнемань илядь, кона лемтьфоль А.С.Черкасовонди. Илас тертьфтольхть Сузгярьгонь библиотекарсь Н.Д.Зуева и А.Черкасовонь тядяц, Мария Ивановна. Синь лама азондсть геройть колга. Андрей шачсь Сузгярьге велеса 1998 кизонь 10 февральста. Кассь кулхцонды цёранякс, лезнесь родителензонды, кельгозень Анна и Татьяна сазорнянзон. Ваймама пингть кельгозе футболса налхкоманц, фильмань ваноманц. Лама пинге ётафнесь ялганзон мархта. Ульсь «Шиня» социально-реабилитационнай центраса. Вейхксоце классонь аделамда меле поступась тонафнема Рузаевкань политехническяй техникуму «Сварщик» специальностьс коре. 2023 кизонь октябрьста тись контракт Оборонань министерствать мархта и тусь Родинаньконь аралама. Служась стрелковай батальонца. 2024 кизонь 3 июньцта А.Черкасов шавовсь. Куломдонза меле Россиянь Президентсь казезе Мужествань орденца. А тяда инголе казьфоль аф фкя боевой орденца. 2025 кизонь 5 майста Сузгярьгонь средняй школаса панчсть лемозонза «Героень парта». Тя иласа примась участия лама од ломаньда.