Кенкшец панжада фалу — 13 июня 2026 г. в 10:52:00.818
Кенкшец панжада фалу Профессиять кочкаманц колга кизефкссь Татьяна Дмитриевнань инголе мзярдовок ашезь аще. Сонь мяльсонза ульсь фкя: сотомс эряфонц иттнень мархта. Вов мес Порапань средняй школать аделамда меле, ламос апак арьсек, поступась Зубово-Полянскяй педагогическяй училищав «Дошкольное воспитание» отделенияв. Тонафнемась мольсь тёждяста, сяс мес кемонь кизонь школаса тонафнемать аделазе цебярьста. Сембе лац мяляфтсазь ся пингть, мзярда странаса тиендевсть эрь кодама полафткст. Тяфтама полафткст ульсть и Порапа велеса. 1996 кизоня идень садсь савсь панжемс одукс. Ашезь работа отопленияц, лама вастова шудесь зданиять вельхксоц. Од заведующайти, а тяфтамкс арась Татьяна Дмитриевна Майорова, савсь сатомшка путомс вий, штоба дошкольнай учреждениясь араль ингольцекс. Но зданиясь сатомшка таштомсь, а ярмакт сонь петеманцты ашельхть. Сяс савсь ётамс теенза шабатнень мархта школав. Тяса ламоц класснай комнататне ляткшнесть шавоста. Эсь вийсост тисть аф оцю ремонт и работась лаказевсь. Сембоц идень садса Татьяна Дмитриевна Майорова работась 22 киза, эздост 16 кизось заведующайкс. Тя пингста сон няфтезень марнек эсь цебярь качестванзон, арась кельгома ломанькс коллективса и велеряйхнень ёткса. Аф прянь няи, трудонь кельги, сон работась толня мархта, лама мяль шарфнесь иттненди: кельгозень синь, пичедсь инксост, ульсь омбоце тядякс. Т.Д. Майорова арась идень коллективонь од работникненди наставникокс. Сон тонафтозень кельгомс эсь аф тёждя тевснон, макссемс иттненди седиень лямбоснон. Татьяна Дмитриевна – Российскяй Федерациянь общай образованиянь Почётнай работник, «Трудонь Ветеран», аф кржа и лия казнедонза. Тяниень пингть Татьяна Дмитриевна пенсияса. Тяни сонь кенярдемац – иденза, и конешна жа, кельгома уноконза. Оцю стирец Ковылкинскяй 4№ школать аделамда меле поступась Ковылкинскяй строительнай техникумонь юридическяй отделенияв. Сонь мялецоль получамс высшай юридическяй образования. Васенце пингть покодсь Ковылкинскяй райононь населениять Социальнай ширде араламань отделсонза. А меле кемоньшка киза макссь пенсионнай фондонь отделенияти, улемок старшай специалистокс. Тяниень пингть Наталья мирденц мархта Москусот. Вакссост и стирьсна Юлия. Сон Моску ошса ОМВД-нь сотрудница. Тяка пингть тонафни юристокс столицань фкя вузса. Ёмла стирец, Раиса, профессияс коре медик, шумордазе Краснослабодскяй медучилищать «Сестринское дело» отделениять. Профессиянц мзярдовок ашезе полафне, покодсь Ковылкинскяй стоматологическяй поликлиникаса. Мирдец, Сергей, конань мархта эряйхть кеветие кизода ламос, цебярь специалист. Сон сафтсы эрь тевса. Цёрасна, Артём, Ковылкина ошень 2 № СОШ-нь тонафни. Татьяна Дмитриевна Майоровась машты инжиень примама, кудоц вестевок аф уленди шава. Иденза, уноконза вестевок аф юкснесазь. Василий Илькаев.