Трудонь кельги ломань — 13 июня 2026 г. в 10:38:00.544
Трудонь кельги ломань Школати анокламась и воспитаниясь ушеткшнихть школада ингольдень учрежденияста. Порапа велеса ули «Колокольчик» мазы лем мархта идень сад. Сон примазень шабатнень эсь уженязонза 1980 кизоня. Сон ульсь 90 шабанди, но эсонза идняда сяда ламоль. Заведующайкс эста ульсь Зубово-Полянскяй педучилищань выпускницась Раиса Николаевна Мелешкина. Сонь лафтунзон лангс прасть сембе идень садонь тефне и эрь тевса сон сафнезе. Пингта меле школаса шамсь начальнай классонь тонафтыень васта, и Раиса Николаевна ётась покодема школав. А идень саду заведующайкс сась Татьяна Савельевна Богомолова. Инголи сон покодсь Порапань медпунктса. Ломатнень мархта работамста пчкафтысь ётась цебярь школа: тонафнесь прянь вятема, седи вакска ляпоняста корхтама. Тяса теенза лездсь эряфкшу медработницась Анна Григорьевна Ануфриева. Т.С. Богомоловать пингста идень саду кочкафтольхть 4 группат, сембоц сяда шабаль. Теест ульсть тифт азоравань, пчкафтыень, природань уженят. Тя сембе пяк тушендсь шабатнень мяльс. Покодиень кочкамста заведующайсь пяк ванць профессиональнай ширеть лангс. Тянь коряс теенза ладясть Е.С. Чекашкинась и Т.А. Мальтисовась, конат тяда инголе покодсть Ковылкинскяй центральнай районнай больницяса. Синь кармасть воспитателькс ясельнай группатнень эса. Старшай группатненди воспитателькс састь эсь велень Зубово-Полянскяй педучилищань выпускницатне Т.Д. Майорова и Т.Ф. Кудашкина. Полафты воспитателькс арасть М.К. Мозгачева и П.П. Кечина. Танцти ярхцамбяль шабатненди пидесть-панцть З.Е. Чекашкина и Н.Е. Чукарова. Инголи синь покодсть ресторанца. Пингонь ётазь Татьяна Савельевна Богомоловась ётась покодема Ковылкинскяй районнай больницяв шабань отделенияв. Тя вастста сон и тусь ваймама. Марстонь покодемань стажец нильгемонь колмува киза. Тяни сон касфты унокт. Стирняц эсь пингстонза аделазе Саранскяйса медицинскяй институтть, фармацевт. И тяни покоди Сасова ошса фармацевтокс. Сонь колма стиренза—Наталья, Елизавета и Кира.