ШАЧЕМА ШИРЕСЬ ТЕРДИ — 13 июня 2026 г. в 10:20:01.003
ШАЧЕМА ШИРЕСЬ ТЕРДИ Краснослободскяй райононь Колапа велень ломаттне эряйхть странаньконь эрь уженясонза. И сембе синь кирдихть кеме соткс эсь ёмла Родинаснон, шачема-касома велеснон мархта. Вов и Р.А. Наумова нинге стирнякс тусь Колапа велеста. Тяса аделась кафкса класст. Поступась тонафнема Самарань кулинарнай училищав. Аф кальдявста тонафнезе пидемань-панемань тевть. Училищать аделамдонза меле Самарань вокзалть видеса ресторанца трудендакшнесь поваркс. —Тя тевти максыне сембе эряфозень,—корхтай Роза Алексеевна.—Тевозень кельгине. Коллективса фалу эсь ломанелень, улень сембоса примеркс лиятненди. Но кодама ба пара афоль уле мокшавать эряфоц, сон фалу кирдезе мяльса эсь шачема-касома уженянц, Колапа веленц. Кодама коллективса афоль покоде, сон мзярдовок ашезь атказакшне корхтамс эсь тядянь-алянь кяльсонза. Васьфти Самараста мокша ломань, тя праздник Роза Алексеевнань эряфса. А Самараса пяк оцю мокшень, эрзянь диаспорась. —Ёрдак байдекса, поват или мокшес, или эрзяс, или Мордовиянь эряйс,—корхтай мокшавась.—Сяс тянь ширде эрь шиня праздник, мярьгат, Колапастовок ашень тушенда. А тяни, мзярда сон пенсияса, нинге сяда маласькодсь эсь шачема-касома уженянц мархта. Сашенды пяк сидеста, примай участия велеса ётафневи илатнень эса. —Мзярда пачкодят сирешити, а апрельста тейне топодсь 70 киза, то шарьхкодьсак, што шачема ширеда мала и питни мезевок аш,—мярьгсь Роза Алексеевна. Шачсь мокшавась Малаефнень семьяса. Аляц, Алексей Дмитриевич, шнама ломанель колхозса. Покодсь и водителькс, и фермаса заведующайкс. Тядяц, Марфа Михайловна, стане жа трудендакшнесь колхозса. Малаефне касфтсть мянь кафкса итть. И сембе синь арасть шнама ломанькс. Марс пуромкшнихть аф сяшкава сидеста. Но Тройцяста сашендыхть Колапав сембе. Якайхть родительснон калмоняснон лангс, лятфнесазь павазу идькс пингснон. А идькс пингоньке минь афкукс ульсь пяк павазу,—корхтай Роза Алексеевна.—Семьяньке хуш оцюволь, но сембоньке ульсь, сембоньке сатнесь. Тядязе и алязе макссть цебярь образования, воспитания. Вачеда ашеме ащекшне. Якафтомазь питни щамса. Роза Алексеевнань вакска ашезь ёта и авань павазоц. Васенце мирдец пингта инголе кулось. Лиссь рьвакс омбоцеда. И вов ни 23 киза марсот. Анатолий Иванович шачсь и кассь Дубёнскяй районца. Сон теплоходонь капитан, уенди Волгать эзга. Роза Алексеевна касфтсь кафта итть. Цёрац, Алексей, стане жа уенди морятнень эзга. Уленди Турцияса, омба масторонь лия странатнень эса. Кой-коста пялень киза аф уленди кудса. Но семьяц тянди ни тонадсь. Цёрац, унокоц. Стирец, Татьяна, покоди аптечнай складса. Цёраняц. Тянь ширдевок Роза Алексеевна павазу ломань. Сембе сонь мяляфтсазь и кельгсазь. Аф идензон, аф уноконзон инкса теенза мзярдовок аф ули визькс. —Тяни мон пенсиясан, сяда сидеста улендян шачема-касома уженясон,—корхтай мокшавась.—И пяк пара, што ули коза сувамс, кинь ширеса ётафтомс ваймама пингозе. А ломаттне Колапаса афкукс пяк трудонь кельгихть, панжада седихть. Сай тяза самаце.