Газетаньконь ялганзон колга — 11 июня 2026 г. в 14:48:00.588
Газетаньконь ялганзон колга Марсот ведьгемоньда лама киза Атерь велень эряйти Фёдор Яковлевич Храмовонди тядде кармай 73 киза. Зрнянь кядь мокшалясь, Атерень шнама ломанць нинге шабакс ушедсь трудендама. Строясь куд, касфтсь итть. Тяни лезды касфтомс уноконзон. Аф ваномок эсь кизонзон лангс, нинге отькорь. —Велеса тевфтома мзярдовок аф лядат,—корхтай Фёдор Яковлевич.—То чакат-покат, то перень тефт. А кда сай эняльдема мархта ломань, эсь тефненьге кадсайть, молят теенза лездома. А кода лиякс. И афкукс, мокшалясь аф машты атказама. Кие, кда аф сон, лезды эряфкшу бабаняти или ськамонза эряй удавати. Эрь шачема шистонза шиньберьф аф сетьмоси телефоноц. Кие аньцек аф гайфни, кодама аньцек шнамань валхт мокшалясь аф куленди. —Прянь шнафтозь азса, што мирдезти пяк оцю честь путнихть,—корхтай рьвац Зинаида Ивановна.—Лямбе валхне седиезт лядыхть, аф юкставихть мзярдовок. Храмофне ведьгемоньда лама киза ни марсот. Да и шачсть фкя шиня. Аньцек мес-бди мокшавать кагодонзон эса сёрматф лия шачема ши. Но тя мезевок аф полафты. Кодак фкя шиня отмечсезь эсь шачема шиснон, тяфтак тянемс и тиендихть. А содама фкя-фкянь ушедсть нинге школаста. Эряфсост сембось ульсь. Елена стирьсна ёфси одняста тусь эряфста. Еленада башка Храмофнень нинге кафта цёрасна и стирьсна. Николай эряй и покоди Москуса. Сергей омба масторса. Ольга Москуса, полициянь капитан. Касыхть сисем уноксна. Эрь ломанть сонцень биографияц, эряфонь киц. Фёдор Яковлевиченьге эряфоц тёждя ашель мзярдовок. Шачсь Атерьса, трудонь кельги оцю семьяса. Родителензон, Яков Антоновичень и Анна Семёновнань, мянь сисем идьтостоль. Сембе кассть трудонь кельгикс, арасть цебярь ломанькс. Синць миртть-рьват сиземань аф содазь трудендасть, добувасть идень касфтомс ярмакт. Фёдор Храмов васенда аделазе Атерень средняй школать, меле тонафнесь Торбеевань 3№ профессионально-техническяй училищаса, получась водителень, трактористонь профессия, сяльде—Саранскяйса крановщиконди, кафта кизот целинасоль. —Тяштьфтеме ниле частса шобдава,—корхтай Зинаида Ивановна.—А мзярда ёфси варьхмодсь, прважаськ армияв служама. Содамок, што рьвяяме, военкоматса макссть «отсрочка». А тоса шачсь васенце иденьке, мельганза—омбоцесь. Тяфта Фёдорозе ашезь пова служама, трудендась, добувась, итть касфтсь. Трудонь стажец мокшалять 45 киза. Лама киза работась Атерень межколхознай строительнай организацияса, «Ремстройжилбыт» участкаса, «Сельхозтехника» производственнай объединенияса, «Светотехника» Саранскяень цехса-филиалса, военкоматса, судса. Эздонза ашезь лядонда и Зинаида Ивановна. Трудендась страхованиянь агентстваса, военкоматса. Трудонь стажец нильгемоньда лама киза.