Тяда ёта библиотеканьконь вакска — 11 июня 2026 г. в 13:24:00.321

Тяда ёта библиотеканьконь вакска ⁣ Тяниень пингть фкя инь оцю задачась—тя касы поколениять духовно-нравственнай воспитанияц и просвещенияц. Тяфтама цель эсь инголенза путы и «Пушкинская карта» социальнай проектсь. Оцю работа од ломаттнень мархта тя тевть коряс вяти А.С.Пушкинонь лемса национальнай библиотекась. Искусствань коряс литературань отделонь сотрудникне 2026 кизоня нолдасть «Они сражались за Родину» программань цикла. Васьфтемань участникне азондыхть советскяй актёрхнень фронтовой исякснон колга, лятфнесазь Ю.Никулинонь, А.Папановонь, В.Этушень, А.Смирновонь, Л.Гайдаень, И.Смоктуновскяень и лиятнень. Эрь программась лемтьф тя или тона фронтовикти. Кепотьксонди, январьста тя циклать коряс библиотекарьхне оцю мяль шарфтсть художникнень-фронтовикнень творчестваснон и блокаднай Ленинградонь периодонь работаснон лангс (Анна Остроумова-Лебедева, Иван Билибин, лиятне). Февральста Н.П.Огарёвонь лемса МГУ-нь лама профилень колледжень студенттненди лама корхтафоль легендарнай народнай артистть И.М.Смоктуновскяень колга. Мероприятияс сафне содазь, што тя ломанть аф тёждя военнай биографияц. Тюрсь фашисттнень каршес Курскяй Дугаса, Днепрать инкса, ётась немецкяй пленть эзга и ворьгодсь. Тя эряфонь опытть И.Смоктуновскяй лац няфтезе эсь ролензон эса. Лацонза ня рольхне киндивок афольхть налхков. Мартста Советскяй Союзонь Геройть П.И.Орловонь лемса 2№ школань тонафнихненди лама азонтфоль режиссёрть-фронтовикть Леонид Гайдаень колга. Мероприятиянь участникне лятфтазь Л.Гайдаень содаф кинолентанзон, фронтовой биографиянц. Лама корхтафоль и сянь колга, мес ваныхне кельг- сазь сонь фильманзон, мзярдовок аф сиреди комедиянзон. Великай Сяськомать 81 кизонь топодеманц карша Саранск ошень 8№ школань кафксоце классонь тонафнихне получасть символическяй казнет, а тяфта жа содафтоськ «Щит и меч»» кинофильмать мархта, няфтеме эздонза пакшкат, конань снимандазе актёрсь-фронтовиксь Владимир Басов. Сон азонды войнань кизотнень советскяй разведчикнень подвигснон колга. Июньцта васьфтемась ули лемтьф аф фкя актёронди-фронтовиконди. 22 июньцта Великай Отечественнай войнать ушедомац. Тя лятфнемань и ризнамань ши. Программань циклась водендаф странаньконь историянцты, культуранцты интересть касфтоманкса, а тяфта жа Родинать кельгоманкса, инксонза ответственностень маряманкса. Сашендода библиотекав. Минь кенкшеньке фалу теенть панжадот. Тяса лама мялень салайда кульхтяда содаф ломаттнень-фронтовикнень колга. Надежда БОЧКАНОВА, А.С.Пушкинонь лемса национальнай библиотекань национальнай и краеведческяй литературань отделонь заведующай.