Од лем — 20 июня 2026 г. в 17:42:00.351
Од лем Эряфса аф вешенди тёждя кит… МАРИЯ ЗАХАРОВНА ЛЕВИНА шачсь 1975-це кизоня Мордовия Республикань Атюрьевскяй райононь Од Кярьга велеса. 1997-це кизоня шумордазе Н.П.Огарёвонь лемса Мордовскяй государственнай университетонь филологиянь факультетть, и лядсь сяда тов тонафнема аспирантурав. 2003-це кизоня аралась кандидатскяй диссертация мокшень корхтаматнень аф фкаксшиснон коряс и тяниень пингти самс покоди мокшэрзянь кялень и литературань кафедраса. Эсь научнай деятельностьсонза ученайсь шарфни оцю мяль мокшень и эрзянь кяльхнень, а тяфта жа лия финно-угрань кяльхнень тяниень пингонь касомаснон лангс. Исследованиянза лемтьфт мокшень кяльть тонафнеманцты, мокшень кялень морфологияти, диалектологияти, лингвогеографияти и лексикографияти, а тяфта жа кафта кяльста ётафтомати. Сёрмадсь 100-да лама работа кялень инь эрявикс кизефкснень коряс. Нят научнай и научно-методическяй статьят, монографият, валкст, учебникт и тонафнемань пособият. Синь ётксост: «Мокшень корхтаматнень лингвогеографиянь ширде ваномасна (2008), «Русско-мокшанский словарь» (автор. коллектив, 2012), «Мокшень диалектологиясь» (2014), «Содамошинь ваномась «Тяниень пингонь мокшень кяльса» балльно-рейтинговай системать коряс (2014), «Мокшанский язык» (автор.коллект., 2025), РИД: «Русско-мокшанский параллельный корпус» (авт.коллек., 2025) и лият. М.З.Левина сувси Мордовиянь республиканскяй олимпиадань жюрити, федеральнай олимпиадань методологическяй комиссияс, Родной кялень федеральнай институтонь экспертнай совету, Россиянь ётафтыень союзу, Россиянь финно-угроведонь комитету, а тяфта жа мокшавань «Юрхтава» ассоциацияти. Казьф Н.П. Огарёвонь лемса Мордовскяй университетонь Почётнай грамотаса (2012), Мордовия Республикань культурань, национальнай политикань, архивнай тевонь министерствань Почётнай грамотаса (2016), Мордовия Республикань Почётнай грамотаса (2025), Мордовия Республикань Правительствань Почетнай грамотаса (2019). Ётка пингста Мария Захаровна кярьмотькшни кельгома тевонцты—стихотворениянь сёрмадомати. Эсь сёрматфонзон эса маряви оцю кельгомась шачема крайти.