«Театральнай поездсь» ульсь Саранск ошса — 26 июня 2026 г. в 12:52:00.228
«Театральнай поездсь» ульсь Саранск ошса 16 июньцта сявомок 18 июньти молемс Саранскяйса ульсь «Театральнай поездсь». Тя илась лемтьф театральнай деятелень Российскяй Союзть 150 кизонь топодеманцты. «Театральнай поездсь»—тя искусствань оцю путешествия странать келес. Саранскяень машина кинь вокзалса сон ульсь 16 июньцта. Мордовиянь ваныхнень учезь аф аньцек спектакльхне, а культурань афкуксонь ила. Тя выставкась, кона лемтьф РФ-нь театральнай деятелень Союзти, театральнай искусствати и профессиятненди. Республиканскяй идень хореографическяй школась, симфоническяй оркестрась, МР-нь идень национальнай симфоническяй капеллань тонафнихне анокласть концерт, спектакль, мастер-класст, творческяй васедемат, а стане жа «Одонь пинге» МР-нь школьнай и студенческяй театральнай студиянь постановкань фестиваль. Тя поездть самста васенце вастса ульсь театральнай Россиять сембе ширде няфтемац. «Театральнай поезд» Всероссийскяй проектсь ётафневи эряфс Российскяй Федерациянь культурань Министерствать и культурнай инициативань Президентскяй фондть лезксснон вельде. 16 и 17 июньцта Саранскяйса ётафтовсь фестивалень оцю программа Мордовия Республикань театратнень и Россиянь лия региоттнень эзда коллектифнень мархта. Ульсть артистт Татарстанцта, Нижегородскяй областьста, Марий Элста и странать лия уженястонза. Азаськ, што тяфтама поездта кафта. Синь ётасазь марнек Россиять. А меле васедихть Моску ошса. Марса тиихть фкя оцю ила. Саранскяйса фестивалень оцю площадкакс арасть А.С.Пушкинонь лемса культурань и ваймамань парксь, И.М.Яушевонь лемса оперань и балетонь Государственнай театрась, Мордовия Республикань рузонь государственнай драмань, мокшэрзянь государственнай национальнай драмань и «Крошка» актёронь и някань театратне.