Лятфнихть войнань ветераттнень идьсна — 26 июня 2026 г. в 12:22:00.192
Лятфнихть войнань ветераттнень идьсна П.И.Сяткин, Атерь велень эряй —Великай Отечественнай войнать мон содаса аф кинофильматнень, книгатнень эзда. Хуш и эста пяк ёмлалень, но лац шарьхкотькшнине, што войнась канды аньцек кальдяв, зиян. Тядязень пряц фалу нолдафоль. Ризнась алязень инкса. Илья Васильевич аф од ломанель ни. Войнать ушедомс кафта оцю стирензоль. Синь тылонь труженицатольхть, коса аньцек ашесть покотькшне, кодама аньцек алянь тефт ашесть тиенде. А брадозе, Никифор Ильич, эста тонафнесь нинге школаса. Аньцек аделазе школанц, эстокиге сявозь фашистнень каршес тюрема. Монь кафцьке инь мала ломанене мрдасть тя войнаста куду. Алязе трудендась колхозса. Брадозевок тевфтома ашезь лядонда. Покодсь колхозса. Ульсь колхозонь председателькс. Лама киза трудендась Атюрьевскяй райисполкомса. Касфтсь кафта стирьхть. Кафцьке педагогическяй трудонь ветератт. Мон тонафнень стама класса, коса пяледа лама тонафнихнень алясна ашесть мрда тя войнаста. Е.Н.Пиксинать (Пугайкинать) аляц ашезь мрда меки куду. П.А.Кашаевать тожа аляц лядсь боень паксяв. М.В.Полькинать сась куду аляц, но эрясь аф ламос, кулось пяк рана. Тяни класстонк лядоме кафонек—мон да М.В.Полькина. Мон старандан аф нолямс кяднень. Вятян ветеранонь Советса общественнай работа. Тернесамазь илас. Васьфнян школаса тонафнихнень мархта, азонкшнян войнать, войнада мельдень стака кизотнень колга. Лятфнесайне алязень, альняказень. Илья Васильевич кафта войнань ветеран. Никифор Ильич ётазе Великай Отечественнай войнать. Кафцьке казьфт боевой орденца и медальса. Инь эряфкшусь Сяткиттнень эзда тяни лядонь мон. Сяс кинь гайфтемац, кизефтемац, сембе пшкятькшнихть тейне. Мезе содан, лездан. Тяни моли СВО-сь. Фашистскяй инекуйхне тага кеподезь эсь пряснон. Но минь теест, кода тяст ёра, аф сяськофтама. Россиясь нинге вестевок ашезь арсе плманжа лангс. И аф арай мзярдовок. Мон, войнань пингонь идсь, тянь пяк лац шарьхкодьса.