П.А.Ключагинонь кельгсазь и мяляфтсазь — 3 июля 2026 г. в 11:19:00.355

П.А.Ключагинонь кельгсазь и мяляфтсазь ⁣ А.С.Пушкинонь лемса республиканскяй библиотекань национальнай и краеведческяй литературань отделса ётась оцю ила, кона лемтьфоль содаф учёнайти, писательти, журналистти П.А.Ключагинонди. Сонь шачема шистонза топодсь 90 киза. Отделонь сотрудникне анокласть цебярь выставка «Эрзянь ойме валдо прев» лем ала. Выставкаса ульсть Пётр Андреевичень книганза, фотографиянза, колганза ялгань лятфнемат. Ломанць сон афкукс ульсь ару вайме, панжада седи. Пяк кельгозень студенттнень, преподаватель ялганзон. Лама тись кода журналист, писатель, учёнай. Тянь квалма лама корхтась отделонь главнай библиотекарсь В.Б.Бояркина. П.А.Ключагинонь эряфонь кинц и творчестванц колга азондсь Мордовия Республикань содаф учёнайсь, педагогическяй наукань докторсь М.И.Ломшин. Михаил Иванович лац содазе сонцень Пётр Андреевичень. Лама киза покодсть марса филологическяй факультетса. Сёрмадсь колганза аф фкя научнай статья. Сембе творчестванц явозе колма пяльксова. Тя Великай Отечественнай войнась и Ключагинонь аф тёждя идькс пингоц. Омбоце вастса кельгомань темась, колмоцеса—сатирась и юморсь. «Мокшень правдать» главнай редактороц И.П.Вешкин содазе П.А.Ключагинонь нильгемоньда лама киза. Сон ульсь теенза аф аньцек тонафтыкс, но и дипломнай работанцты руководителькс. Пяк лямбоста Пётр Андреевичень колга лятфнесь печатень ветеранць Р.Б.Щанкина. Раиса Борисовна азсь мяль ётафнемс Ключагинскяй лувомат. Пётр Андреевичень творчествац пяк козя, мялень салай. Ули мезе азомс и няфтемс лувихненди. «Сятко» журналса покодись Алина Слугина лувозень эсь пеетьксонзон. Мордовия Республикань Заслуженнай поэтсь Г.С.Гребенцов ульсь цебярь ялгакс Ключагинонди. Марса васьфнесть лувихнень мархта, якасть оцю илатненди, пуромксненди. Тя иласа кайгсть стихт, морот. Ламоль лямбе и пяк интереснай лятфнемада. Кулось П.А.Ключагин 2021 кизонь 31 августста. Калмазь шачема-касома велезонза, тядянц ваксс. Лиякс азомс, Атяшевскяй райононь Кулясова вели. Писательсь эряй снярс, мзярс сонь мяляфтсазь, мзярс кармайхть лисендема книганза, мзярс лемозонза ётафневихть илат. П.А.Ключагин аф юкстави мзярдовок. Сон эряй студентонзон, преподаватель ялганзон, творчестванц кельгиензон мялямса.