Титофнень семьясна арась сяськикс «Россиянь студенческяй семьятне» пялькстомаса — 3 июля 2026 г. в 12:00:02.611
Титофнень семьясна арась сяськикс «Россиянь студенческяй семьятне» пялькстомаса Титофне, а нят мирттне-рьвятне Дмитрий и Светлана, синь цёрасна Герман, эряйхть Саранскяйса. Синь арасть сяськикс Российскяй Федерациянь наукань и высшай образованиянь Министерствать эзда Всероссийскяй «Россиянь студенческяй семьятне» пялькстомаса. Дмитрий и Светлана—Н.П.Огарёвонь лемса Мордовскяй государственнай университетонь электроникань и светотехникань институтонь студентт. Пялькстомась ётафтовсь «Семья» национальнай проектть «Поддержка семьи» федеральнай проектть эряфс ётафтоманц мяльса кирдезь. Операторкс ульсь Г.Р.Державинонь лемса Тамбовскяй государственнай университетсь. Сембоц пялькстомаса примась участия 253 студенческяй семья Россиянь 55 регионцта. Участникне пялькстсть спортивнай, творческяй, кулинарнай и интеллектуальнай этапнень эса. Стане жа финалу лисихненди ётафтовсть экскурсият, мастер-класст и мялень салай оцю программа. Сяськихнень лемснон азозь Москуса студенческяй семьянь Всероссийскяй II фестивальть пленарнай сессиясонза, кона ётафтовсь М.В.Ломоносовонь лемса МГУ-са. Сяськиень каземань церемонияса примасть участия Российскяй Федерациянь Федеральнай Собраниянь Федерациянь Советть председателец Валентина Матвиенко, Российскяй Федерациянь наукань и высшай образованиянь министрсь Валерий Фальков, общественнай проекттнень коряс Российскяй Федерациянь Президентть Управлениянц начальникоц Сергей Новиков и Россиянь Геройсь, колмоксть Олимпийскяй чемпионць, Российскяй Федерациянь сенаторсь Александр Карелин. Кода азозь Светлана и Дмитрий Титофне, конкурсса пялькстомась – тя лия региононь од семьятнень мархта пара васетькшнемат, корхнемат, фкя-фкянди мялень азондомат. «Минь фкя-фкянь мархта полафтоме маштомошиса, пуроптоме лама одня, корхнеме вузонь вятихнень, властень представительхнень мархта, тяконь лувксса сятнень, конат макссихть лезкс идь мархта од семьятненди»,—корхтай Дмитрий Титов. Сон азозе, што улемс студентокс и тяка пингть пуроптомс семья и касфтомс шаба тяниень пингть Мордовияса аф стака: «Миньцонк республикань Оцюнясь Артём Здунов ётафни демографиянь виияфтомань и од семьянь ширень кирдемань кели политика, сувафневихть и тевс нолявихть эрь кодама мерат. Тядянь и идень комнататне, эрь кодама пособиятне и ярмаконь пандоматне лездыхть аф кадондомс павазть вандыень шити». Государствать ширде лезксонь максомать вельде од ломаттне аф пелихть пуроптомс семьят, шачфнемс шабат. Тячи Россияса 60 тёжяньда лама студенческяй семья—мекольце кизоть синь лувкссна кассь кафтонь-крда.