Асу тонафты — 3 июля 2026 г. в 08:09:01.360
Асу тонафты Виктория Мелёшкина шачсь и кассь Атюрьевскяй райононь Крхтаж велеса. Тяфта ни лиссь эряфса, што родителенза сяда сидеста вахтань методса покодсть Москуса. Виктория эрясь атянц, Николай Васильевичень, бабанц, Тамара Матвеевнань, мархта. А синь тиезь семботь сянкса, штоба стирнясь касоль кулхцондыкс и трудонь кельгикс, получаль цебярь образования. Тамара Матвеевна—педагогическяй трудонь ветеран, рузонь кялень и литературань тонафты. Крхтажень школати макссь 40 лама киза. Бабанц лангс ванозь тонафтыень тевть ушедсь кельгомонза и Викториясь. Сембоса кепотьксокс стирняти ульсь и класснай руководителец, мокшень, рузонь кялень и литературань тонафтысь Н.Я.Алёнина. Вейхксоце классти молемс классна оцюволь. А тоса лядсь колма ученикт. Стирнясь тонафнесь аньцек ветес. Примась участия районнай, республиканскяй, региональнай олимпиадатнень эса. И фалу лисендсь сяськикс, призёркс. Варчсезень виензон стихонь, азксонь сёрмадомаса. Эсь аф оцю произведениянзон печатлакшнезень «Мокшень правда» газетаса, «Якстерь тяштеня» идень журналса. 2018 кизоня Виктория Мелёшкина якась оцю илас Казани. Мордовиять эзда эсонза ульсть колма школань тонафнихть. Виктория оцю форумда инголе сонць рузонь кяльс ётафтозе А.С.Малькинонь стихотворениянц и лувозе пуромфненди. Усксь Казаньцта оцю казне, кона тянемс ащи школань омбоце этажень фойеса. Школать аделамда меле Виктория Мелёшкина поступась тонафнема Мордовскяй госуниверситетонь филологическяй факультету. Тонафнесь аф кальдявста. Примась участия факультетть, вузть общественнай эряфсонза. Тясовок тонафнемстонза венемсь минценнети, мокшеннети. Оцю илатнень, кодама повсь фестивальхнень, форупнень эса няфтезень национальнай щапнгень-каряпнень. Сонь фотографиянза сувасть «Мордовский костюм» альбомти-каталокти, кона нолдафоль 2024 кизоня Саранскяйса «Константин Шапкарин» издательстваса. Вузонь аделамда меле Виктория Мелёшкинась покоди Мытищи ошень средняй общеобразовательнай школаса рузонь кялень и литературань тонафтыкс. Эсь тевонц Крхтаж велень стирнясь тиендьсы маштозь, совестьс коре. Кельгсазь тонафниенза, синь родительсна. Лац од специалистть примазь и тонафты ялганза. Школань дирекциясь азонкшни лемозонза аньцек шнамань валхт. Оцю гордость эсь ученицаснон, выпускницаснон инкса маряйхть и Крхтажень школаса. Педагогическяй трудонь ветеранць Н.Я.Алёнина лама вий путсь сянкса, штоба Виктория Мелёшкинась кочкалезе учителень тевть, араль оцю букваста тонафтыкс. И тя теенза удалась. Эряфсь аф ащи фкя вастса. 2025 кизонь августста од тонафтысь пуроптсь эстеенза семья. Мирденди кочказе Саранскяень цёрать. Эряйхть ладязь, кельгозь, фкя-фкянь шарьхкодезь. Тяни Виктория Мелёшкина тонафни Мордовскяй госуниверситетонь филологическяй факультетса магистратураса. Илья ВЕШКИН.