Тядязе и сонь пара тевонза — 3 июля 2026 г. в 08:26:00.883
Тядязе и сонь пара тевонза Мялезе азондомс тядязень, Мария Ивановна Чикировать, колга. Шачсь сон 1940 кизоня Владивосток ошса. 1941 кизоня семьясь мрдась шачема ширезонза, Ковылкинскяй райононь Од Пшень вели, коса ётасть сонь идькс пингоц, стирень кизонза. Тядязе рана лядсь аляфтома. Щятязе, Иван Филиппович Кечин, ашезь мрда Великай Отечественнай войнаста, тянемс лувондови куляфтома юмафокс. Тядязень идькс пингоц савсь войнань и войнада мелень стака кизотненди. Нинге ёмла стирнякс оцюфнень мархта ряц покотькшнесь паксяса. Кеветие кизоса ни якась торфонь таргама Гусь-Хрустальнай ошу, штоба добувамс кодамовок ярмак, щамс-карямс эсь прянц, лездомс родителензонды. Нильгемонь кизозонза тядязень эряфоц сотфоль шачема веленц мархта. Тяса сон трудендась колхозса, лиссь рьвакс эсь велень цёранди, Семен Иванович Чикировонди. Цёрась покодсь трактористокс. Синь марстонь эряфсна мольсь 47 киза. Эряфсна ульсь павазу, шачсть вете идьсна. 1981 кизоня семьясь ётась эряма Ковылкина ошу. Аф тёждяль тядяньконди-аляньконди путнемс-ладямс эряфсь ошса. Штоба щамс-карямс шабатнень, предприятияса работада башка ошсовок эрязь касфнесть жуватат. Работада мелевок покодсть, юкстамок сиземать колга. Шабатне эрявсть касфтомс, максомс теест цебярь образования. Тя пингти алязе кулось и тядязе шабатнень вятезень оцювонь эряфти ськамонза. Шабатне пяк асуфтольхть, лац тонафнесть школаса, а школать аделамда меле техникумса, вузса. Сембе покодихть получаф специальностьснон коряс: оцю стирец, Нина, медицинскяй работник, Ирина трудендай идень садса, Марина покоди «Мокша» санаторияса» организационно-кадровай службань оцюнякс, Галина тяка санаторияса покоди лечебнай физкультурань инструкторкс, Иван—водитель. Тядязе казьф Материнствань II степенень медальса. Сонь шабанза казсть теенза сисем унокт и кота уноконь итть. Минь, стиренза и цёрац, сюконятама и астама спасиба тядяньконди сянкса, мес макссь тейнек цебярь воспитания, образования. Тядязе лама киза ни пенсияса. Цебярьста покодеманкса казьф медальса, Благодарностьса, лама Почётнай грамотанза. Ули и «Трудонь ветеран» медалец. Тяни тядязти 86 киза. Минь кенярттяма инксонза. Сон тяфтама жа отькорь и эряфонь кельги. И мзярда шумбрашинь ширде теенза кальдяв, сон сяка аф няфни пря. Тядяньке эряфоньберьф лама покодсь. Тянивок тевфтома аф ащекшни. Тиенди авань наряжамбяльхть: крганят, петькст... Тя тевсь аф тёждятнень эзда, веши лама трудта и маштомошида. Эряви эрь ожнанясь путомс эсь вастозонза.Эста лиси цебярь, мялень пети работа. И сембось монь тядязень лисенди. Эрь тевсь кядьсонза эреклай. Тядязень кядьса тиф работатнень мяль вельде рамсесазь. Вешфкссь пяк оцю. Коста аньцек аф сашендыхть ломатть. Тядязень тя мялезонза. Колганза содайхть. Трудонцты макссихть оцю питне. И тя 86 кизоса. Кельгома тевоц юкстафтсыне сембе сярятьфонзон. Мезе тядязе машты, содай, пяк мялец максомс од ломаттненди. Штоба тя афоль юкстав, штоба сонь кельгома тевоц эряль. Моньге пяк мялезе, штоба тядянь-алянь кудсонк сяда куватьс палоль светсь, маряволь тядязень вайгялец и сон афоль сяряде. Мялезе сюконямс теенза сембе шабанзон эзда. Минь марятама инксонза гордость, шнафттама мархтонза пря. Сон няфни тейнек, идензонды, уноконзонды, уноконь идензонды цебярь пример. Марина Скоробогатова.