45 кизода лама «Мокшень правдать» мархта — 3 июля 2026 г. в 06:47:01.301
45 кизода лама «Мокшень правдать» мархта Нинге аф кунара Атерь велень мокшавать, трудонь ветеранть М.Ф.Якомасовать кудса лаказь-лакась эряфсь. Синць миртть-рьват, колма шабасна. Перьфсна пяшксе жуватада. Мезе аньцек ашесть кирне: тракст, буканят, тувот, куднармотть. И сембонди мушендовсь пинге. А тяни мокшавась эряй ськамонза. Мирдец пингта инголе кулось. Иденза оцюфт. Синцень семьясна, эряфсна-ащефсна. Но юкстаф ломанькс лемдемс Мария Филипповнань аш кода. Сонцьке нинге отькорь, ламось теенза вийс коре. Сидеста сашендыхть варжамонза иденза, уноконза. Пяле Атерь радняц. Трудонь кельги мокшавась машты инжиень примама-каваняма. Сембонь мархта мушенды марстонь кяль. Шачсь Мария Филипповна Пьянзиттнень оцю и трудонь кельги семьясост. Аляц, Филипп Константинович, Великай Отечественнай войнань ветераноль. Лама пинге покотькшнесь районнай внутренняй тевонь отделса, «Сельхозтехника» объединенияса, школаса. Тядяц, Анна Фёдоровна, тылонь труженицаль, «Память Ильича» колхозонь почётнай колхозницаль. Касфтсть ниле итть. Нилецьке эряйхть Атерьса, афкуксонь патриотт, шачема-касома велень кельгихть. Мария Филипповна аделазе Атерень средняй общеобразовательнай школать. Одоль, отькорель. Панжадотольхть инголенза сембе китне. Кода и лия стирня ялганза, арьсесь варжамс ошень эряфть. Но куватьс ашезь сата. Кафта кизот покодсь перень сёронь базаса. Пяк лажаткшнесь куду. Кадозень ошса сембе тевонзон и мрдась шачема велезонза. Васенда лама киза трудендакшнесь «Светотехника» производственнай объединениянь Атерень цехса-филиалса шлифовщицакс, прессовщицакс. Мокшавать приметнезь, трудонц отмечсезь казнеса. Тяда меле 20 кизода лама покодсь районнай больницянь хирургическяй отделенияса сестра-хозяйкакс, санитаркакс. И тясовок аньцек шнамань валхт. Мария Филипповна полафтсь ниле главнай врачт. А хирургическяй отделенияса покодсь содаф хирургть М.Н.Царёвонь кядяла. Тяни сон аш ни шиса. Но Мария Филипповна лятфнесы аньцек шнамань валса. Кафта кизода инголе Мария Филипповна лядсь мирдьфтома. Иван Николаевич работась «Сельхозтехника» производственнай объединенияса водителькс, «Память Ильича» колхозса постуфокс. Марса эрясть ведьгемонь киза. Строясть куд. Касфтсть колма итть. Оцю цёрасна, Сергей Иванович, эряй Москуса, заняф строямань тевса. Елена Ивановна—капитан, покоди Мордовиянь УФСИН-нь системаса. Татьяна Ивановна эряй Краснослободскяйса, трудендай учхозса. Мокшавать сисем уноконза. Ули и уноконь идец. Тянь ширде пяк козя и павазу ломань. М.Ф.Якомасова—мокшень кялень кельги ломань. Цебярь ялга эсь кяльсонк лисенди газетати. «Мокшень правда» сёрматфни 45 кизода лама. —Аньцек шачсь монцень семьязе, ушедонь сёрматфнема «Мокшень правда»,—корхтай Мария Филипповна.—Газетать кельгса, учса эрь номеронц. Лувондса васенце лопаняста сявомок мекольцети молемс. И фалу мушендан мяльс туй статьят, цебярь советт. А мекольдень пингть газетась арась сяда мазыкс, эрекокс, мялень кеподикс. Куватьс мокшавать мархта корхнеме эсь кяльсонк лисенди газетать колга. Сон сёрматфнесы и морафнесы 45 кизода лама. И вестевок нинге ашезь каендакшне. Газетась мялезонза. А рузкс корхтай мокшетнень, эсь кяльсонк лисенди газетать эзда атказайхнень аф шарьхкодьсыне. —Кода можна атказамс родной кяльцень эзда, кона сась тейть тядянь лофцть мархта,—корхтай Мария Филипповна.—Тя кизефксть лангс аш монь ответозе. Аделавсь 2026 кизоть омбоце пяленцты «Мокшень правдати» сёрматфтомась. М.Ф.Якомасовась васенцетнень эздоль, кие тяштьфтсь эсь кяльсонк лисенди газета.