Велеса мяляфтсазь эсь геройснон — 10 июля 2026 г. в 14:49:00.688
Велеса мяляфтсазь эсь геройснон Рузаевскяй райононь Сузгарья велеса инь няевикс вастса ащи Великай Отечественнай войнаса шавфненди обелисксь. Сонь перьфоц фалу кирдеви арушиса. Культурань, библиотекань, велень администрациянь работникне школань тонафнихнень, учительхнень мархта озафнихть панчфт, валондсазь синь, ваныхть мельгаст. А мзяра илада ётафневи тя обелискть ваксса! Аш стама семья Сузгарья велеса, конань ба афолезе тока Великай Отечественнай войнась. Кой-кона семьятнень эзда Родинаньконь аралама тущендсть колмонь, ветень ломань. Мрдасть меки аф сембе. Кепотьксонди, велень хозяйствань ветеранть Н.Б.Амбаевонь тюрсь фашисттнень каршес аляц. Сон сась войнаста афкуксонь геройкс боевой орденца и медальса. Сузгарья велень поселениянь оцюнять Г.В.Кажаевонь ульсь войнаса атяц, Афанасий Кузьмич. Сон тожа герой. Аф лядонды шири Сузгарья велень поселениянь ветеранонь первичнай организациять оцюняц Р.М.Миронова. Аф ичкозе велеть эзда войнань пингть шавовсь лётчиксь Николай Игнатьевич Алёхин. Сонь тожа велеса аф юкснесазь, лятфнесазь сидеста. Кеняртьфти ся, што тяфтама илатнень эса примсихть участия школань тонафнихне, велень культурань и библиотекань работникне. Аф кунара васьфнень велень библиотекарть Н.Д.Зуевать мархта. Сон лама аноклакшни и ётафни военно-патриотическяй темас илада, коса азонкшни Великай Отечественнай, Афганскяй, Чеченскяй войнань ветераттнень колга. Велень од цёратне, алятне примайхть участия СВО-са. Синь колгастка Нина Дмитриевна кочкась лама интереснай материалда. Ётафни лемозост лятфнемань мероприятият. —Библиотекасонк, клубсонк лама материалда кочкаф велень героеньконь колга,—корх- тай Н.Д.Зуева.—Минь синь аф юкснесаськ. Азонкшнетяма колгаст касы поколенияти. Иттненди, од ломаттненди эрявихть содамс велеть историяц, Родинань аралайхнень, геройхнень лемсна.