Эряфоньберьф—мороть мархта — 10 июля 2026 г. в 15:00:04.026
Эряфоньберьф—мороть мархта Музыкась эряфсонк занци оцю васта. Арьсеф аф аньцек весялготкшнеманди, сон лиякстоптсы ломанть прянь маряманц. Ётамок ёнть, сон сувай видеста ваймоти и тии кепотьф мяль, эвондафты ломанть эса эрь кодама мяльхть-арьсемат. Сон стане жа лафчепнесы, сетьмофнесы, кяжияфнесы. Цебярьста содафт тястонь авторть и моронь сёрмадыть Надежда Рузайкинать моронза. Шачсь сон Ковылкина аймаконь Рыбкина велеса. 1961-це кизоня семьясна ётась эряма Краснослободскяй аймаконь Колапа вели. Велень школать аделамда меле поступась тонафнема Ардатовскяй культпросвет училищав. Сонь ульсь мялец тонафнемс музыкальнай грамотать и тонадомс аккордионца морама. Музыкати кельгомать тейнза максозе сонь сазороц, кона пяк лац маштсь морама. Сембе ся маштомошитне кондястсть тейнза эряфса, мзярда покодсь школаса и велень клубса. Музыкань сёрмадомась лиссь апак фатяк. 2002-це кизоня лиссь «Местечко родное» васенце мороц. Надежда Рузайкина—рузонь и мокшэрзянь моротнень сёрмадысна и морсисна. Сонь творчествасонза пцтай 40 мора. Эрсь эздост—сонь эряфонц пялькскац, ваймонц вайгялец. Авторть творчествасонза панчсеви патриотизмань тема, кона няеви родной кяльти, ёмла Родинати кельгомать и проектса участиять вельде, конат лемтьфт странать героическяй ётай пингонцты. 2021 кизоня Н.Рузайкина арась «О родине, о подвиге, о славе!" военно-патриотическяй моронь районнай конкурсонь дипломантокс». Надежда Рузайкинать творчествац сявонди цебярь мяльхть-арьсемат. Мокшэрзянь народть кяленц, обуцянзон крхкаста содамасна тиендьсазь сонь творчестванц эрявиксокс и арсихть прянь шнама вастокс эсь народонц ёткса. Аф кунара А.С.Пушкинонь лемса Национальнай библиотекаса ётась Надежда Рузайкинать «Славлю тебя, Мордовия, с Верой, Надеждой, Любовью» лем ала творческяй илядец. Илась аноклафоль МР-нь культурань, национальнай политикань и архивнай тевонь Министерствать, «Мордовия Республикань Народонь Куд» Региональнай Общественнай организациять, А.С.Пушкинонь лемса Национальнай библиотекать лезкснон вельде. Илань перьф кайгсть морот, конатнень моразень авторсь, эрть эса няевсь сонь эряфонц пялькскац, ваймонц вайгялец. Илядти мазоптомбялькс ульсть Н.Рузайкинать земляконза—Ковылкинскяй райононь Рыбкина велеста «Ляйне» фольклорнай ансамбльсь. Синь морамстост кайгсть Н.Рузайкинать музыканц коряс морот. Ламоц землякне, конат эряйхть республиканьконь эзда ширеса, кирдезь Надежда Гавриловнань ширенц онлайн-участияса. Арьсетяма Надежда Гавриловнанди кеме шумбраши, пара мяльхть-арьсемат и сяда тов оцю творческяй сатфкст. Вера Пронина, А.С.Пушкинонь лемса Национальнай библиотекань главнай библиотекарсь.