«Солнечнай» микрорайонца ётась фестиваль — 10 июля 2026 г. в 13:17:00.564
«Солнечнай» микрорайонца ётась фестиваль Кизось—тя тяфтама пинге, мзярда можнат ётафнемс илат, семья мархта ваймамс. Мялень салай ила ня шитнень ётафтовсь Саранск ошть северо-западонь «Солнечнай» микрорайонцонза. Республикать столицасонза сон тядде ветецесь ни. Илась тусь и иттнень, и оттнень, и сиренятнень мяльс. «Шабань ош, арьсемань ош» интерактивнай идень площадкаса шабатнень мархта налхксесть аниматорхне. Ётафнесть весяла эстафетат, кштимат, викторина мархта налхксемат. Эрь шабась няфтезе, мезе содай, мезе машты. Од ломаттненди пяк мялезост ульсть мастер-классне и творческяй пуромксне, налхкоматне. Спортивнай зонаса цёранятненди футболть коряс няфтсть мастер-класс «Шумбрат» ФК-нь футболисттне, а сяльде ётась—фото и автограф-сессия. А борьбаса мастер-класс няфтсть содаф борецне Артём и Максим Суркофне, Алексей Киянкин и Денис Муртазин. Сценать лангса ётафтовсь мялень салай концерт. Микрорайононь эряйхнень инголе морасть-кштисть «Вармава» ансамбльсь, «Отрада» моронь народнай театрась и «Млада» моронь народнай ансамбльсь. Ашезь ёта илась гармонияфтома и сиде мороняфтома. Ломаттнень мархта васетькшнема сашендсь и республикань Оцюнясь Артём Здунов. Сон ванозень фестивалень сембе зонатнень, макссь питне пирьфса ётафтф петемать-мазоптомать коряс тиф тефненди, казсь од спортсметтненди инвентарь футболса и теннисса налхкоманди. Тя микрорайононь куттнень ули и лама функциянь спортивнай площадкасна и тренажерсна. Маластонь кудонь ТСЖ-нь председательхне сюконясть Артём Здуновонди и Мордовиянь командати, ошень администрацияти микрорайононь эряйхненди мялень шарфтоманкса, кудпирьфнень петеманкса-мазоптоманкса. Тястонь эряйсь Полина Тулкина азозе: «Минь микрорайонцонк и пирьфсонк пяк лама шабада, сяс минь пяк кеняртькшнетяма тя цебярь илати». Солнечнай микрорайонца эряй 6 тёжянть малава ломань. Работайхть идень сад, школа и автомеханическяй техникум. Эряви азомс, што эрямань районца мекольдень кизотнень ламось полафтсь цебярь шири. Петьфт кафта кит—сувамась Лямбирскяй шоссеть и Солнечнай ульцять эзга лама квартирань куттненди. Шумордавсь коррекционнай школать строямац, кона лама пинге юкстафоль. Инголи ульсть петьфт-мазоптфт мзярошка МКД-нь кудваксонь территория, а ёфси аф кунара Солнечнай ульцяса шумордавсь фкя пингста вете лама квартирань куттнень пирьфснон асфальтса ацамасна. Микрорайонти маластонь вете кизоста карьхцяф пцтай 85 миллион цалковай. «А минь пирьфсонк» фестивальсь сяда тов ули ётафтф Саранскяйть юго-западнай пялькссонза.