Получасть диплопт — 10 июля 2026 г. в 13:32:01.182
Получасть диплопт Н.П.Огарёвонь лемса госуниверситетса ульсь оцю ила—филологическяй факультетонь студенттненди-выпускникненди макссть диплопт. Сонць илась ётась вузть ИНК-нь корпусть оцю залсонза, кона пяшксель выпускникта, преподавательда, инжида. Тядятне-алятне, мала ломаттне састь панчф мархта. Васенце пяльксса ульсть поздравленият. Вузонь шумордайхнень лемс лама шнамань и паронь арьсемань валда азсть филологическяй факультетонь деканць И.Н.Рябов, журналистикань кафедрань вятись, профессорсь Л.Н.Резяпкина и лиятне. И.Н.Рябов азозе: «Тинь тонафнеде филологическяй факультетса. Преподавательхне макссть теенть аф кальдяв содамошит. Тинь оттада, инголент сай пингсь, сембе эряфсь. Тинь ашеде лядонда шири вузть, факультетть общественнай эряфснон эзда. Примаде участия пялькстоматнень, конференциятнень, фестивальхнень эса. Тяни тинь эсонт учихть школаса». Кие аделась бакалавриат, И.Н.Рябов арьсесь сяда тов тонафнемс, арамс цебярь специалистокс. Магистратурань аделайхненди арьсесь оцю сатфкст покодема вастсост. Лятфнезь иласа инь активнай студенттнень. Нят Юлия Тувышкина, Анастасия Денисова, Даша Шиндяйкина. Синь ульсть лама оцю иласа. Арнесть лия ошева кялень и литературань конференцияс и сявондсть тоса васенце вастт. Няфнезь эсь пряснон и лия ширде: морасть и кштисть, ульсть факультетса лиятненди примеркс. Студенттне азсть шнамань валхт факультетонь преподавательхненди. Лятфнезь эсь павазу студентонь кизоснон. И макссть вал, што коса ба афольхть покоде, инксост визькс тонафтыснонды аф ули.