Кадошкинаса ётась ила — 24 июля 2026 г. в 15:18:01.449
Кадошкинаса ётась ила Ня шитнень Кадошкинань эряйхне васьфтезь посёлкаснон шачема шинц. Илать ушедозь ваймамань паркса. Посёлкань эряйхнень и инжихнень тя шить мархта лямбоста поздравляндазь муниципальнай райононь оцюнясь Андрей Чаткин и МР-нь промышленностень, наукань и од технологиянь министрть тевонзон тиендисна Александр Давыдкин. Тя шиня ульсь азф аф кржа поздравления эряйхнень лемс, кинь апак лотксек трудснон вельде тиендеви поселкать эряфоц, мазышиц. Почетнай грамотат и Благодарностть лама киза цебярьста покодеманкса максфтольхть учреждениянь и организациянь труженикненди. Активнай гражданскяй позициянкса, оцю путксонкса гуманитарнай лезксонь кочкамать и кяшендемань сетень кодамать, СВО-в прважамать инкса МР-нь Оцюнять Благодарственнай сёрманза максфтольхть Адила Альмяшевати, Гульнара Вяльшинати, Оксана Кошелевати и Людмила Юнязовати. Ладяф койть коряс тя шиня инь цебярь семьятненди максфтольхть «Кельгомать и верностть инкса» медальхть. Тяфтама казне макссть миртти-рьвяти Григорьефненди. Евгений Александрович и Ольга Юрьевна рьвяяфт 31 киза. Кафцьке шачсть, кассть и пуроптсть семья Кадошкина поселкаса. Павел цёрасна, кона 2022 кизонь сентябрьста сявомок и тяниень пингти самс СВО-нь ётафтома вастса. Теенза максф боевой действиянь ветеранонь лем. Григорьефнень семьясна кеме, кельгови велеряйхнень ёткса, эряйхть ладязь и фкя-фкянь шарьхкодезь. Шабань лац касфтоманкса, кеме гражданскяй позициянкса Семьянь, кельгомань и верностень шиста, Мордовиянь авань Союзсь Почётнай Грамотаса казезень Руслан и Наталья Байчуриттнень семьяснон. Поздравленият азфтольхть и семьять лемс, кона кельгозь и фкя-фкянь шарьхкодезь эряйхть 52 киза. Нят Иван Николаевич и Татьяна Васильевна Пудиттне Синь касфтсть кафта стирьхть, меле лездсть касфтомс унокснон. Ужяленди, оцю уноксна, Денис Морозкин, 2022 кизоня шавовсь специальнай военнай операциянь зонаса. Куломдонза меле казьф «За отвагу» медальса. Аф ваномок эряфонь сембе стакатнень-сталмотнень лангс, мирттне-рьвятне кирдихть и лезнихть фкя-фкянди. Кеняртьфти и ся, што поселкаса лама од эряйда. Кепотьксонди, тяддень июньцта Тамара и Дмитрий Тамбовцефнень семьяса шачсь стирнясна—Анечкасна. Эряви азомс, што семьясост касы нинге цёранясна—Артём. Лямбе поздравленият азфтольхть и Юнязофнень лама идень семьяснон лемс, конатнень тядде шачсь цёрасна, Арсений. Лама лямбе валда азфоль посёлкань эряйхненди—Екатерина Васильевна Сильченковать и Виктор Иванович Диковонь лемс. Кафцьке синь юбилярхт. Васенцети топодсь—90, омбоцети—80 киза. Поздравляндазь посёлкань эряйхнень священникне Павел и Андроник. Марстонь казнекс посёлкань эряйхненди и инжихненди арась концертсь, конань аноклазь районнай Культурань кудонь творческяй коллектифне.