Ельникаса ётась народнай творчествань фестиваль — 24 июля 2026 г. в 14:37:00.958
Ельникаса ётась народнай творчествань фестиваль Ельниковонь аймакть шачема шинц тостонь эряйхне васьфтезь цебярь и одкстоптф паркса. Мордовиянь Оцюнять Артём Здуновонь лемста райононь эряйхнень поздравляндазень МР-нь Госсобраниять Председателец Владимир Чибиркин. Инь пара арьсемат тяфта жа азсь муниципалитетонь оцюнясь Юрий Бекешев. Койс коре илать мазоптозе «Рузонь матрёшка» народнай творчествань фестивальсь. Эсь музыкальнай казнеснон велеряйхненди казезь Атерень, Ельникавонь, Краснослободскяень и Темникавонь артист- тне. Синь морасть рузонь, мокшэрзянь и татаронь кяльса седиень токай лирическяй и весяла морот Родинать, шачема кудть, тядянь лямботь колга. Кштимань коллектифне кеняртьфтезь ломаттнень мялень кеподи хореографическяй композицияса. Кулхцондыхнень мяльснон кеподезе вокально-инструментальнай од дуэтсь, коза сувасть Ельникавонь музыкантсь Иван Сургаев и Темникавонь гармонистсь Геннадий Уткин. И кода тя уленди иласа, башка мяль шарфтсть райононь инь цебярь труженикнень лангс–теест макссть заслуженнай государственнай казнет. Ветеранти Александра Ивановна Горшенинати Ельниковскяй муниципальнай районть социально-экономическяй виияфтоманцты оцю путксонкса максфоль «МР-нь Оцюнянь премиянь лауреат» звания. Ельникавонь администрациясь тяфта жа отмечазень Оцю Уркат и Каменнай Брод велень пенсионеркатнень Татьяна Афроськинать и Валентина Кокоревать и Сире Тештелимонь эряйть Сергей Огнивовонь шачема велень социальнай эряфса и благоустройстваса активнай участияснон инкса, а тяфта жа «Ельникавонь патруль» народнай дружинань доброволецнень, конат макссихть оцю лезкс общественнай порядкань ванфтомаса. Илять илань эстафетать сяда тов мольфтезь Республикань филармониянь солисттнень, Мордовиянь заслуженнай артисттнень Александр Сергеевонь и Андрей Бочкановонь концертса.