Сире Шайговаса отмечазь районть шачема шинц — 24 июля 2026 г. в 14:25:00.694
Сире Шайговаса отмечазь районть шачема шинц 18 июльста Сире Шайговань аймаксь отмечазе шачема шинц— муниципалитетть пуроптомста топодсь 98 киза. Мероприятиятне, конат лемтьфтольхть тя шити, ётафтовсть Сире Шайгова велень культурань и ваймамань центральнай паркса. Тя шиня тяса ётафтовсь «Ярхцама васта», «Атянь-атяньконь койснон ванфтсаськ и эреклафтсаськ» Х Республиканскяй национальнай гастрономическяй фестивальсь. Илась пуроптозень марс сембе республикань инжихнень. Мероприятиять программац пяшкотьфоль национальнай мазы тюсса и творчестваса. Шиньберьф работасть декоративно-прикладной искусствань мастерхнень выставкасна, эрь кодама ремёслатнень коряс мастер-классне, народнай промыслань ярмаркась, национальнай ярхцамбялень выставкась-дегустациясь, иттненди спортивнай площадкатне и налхксемань васттне. Эрь инжись мусь мяльс туф тев и марязе афкуксонь народнай илань ваймопожфть. Мордовиянь Оцюнять Артём Здуновонь лемста илань участникнень поздравляндазень МР-нь Государственнай Собраниять Председателец Владимир Чибиркин. «Районть пара тевонза и сатфксонза—тя сонь эряензон, трудонь ломаттнень сатфкссна. Синь виень путомаснон вельде тяса ацафт асфальтонь кит, велетненди ётафтф газ, строяфт социальнай объектт—школат, больницят, культурань кутт. И сембода эрявикссь, районца ванфтсазь эсь юрснон, койснон-обуцяснон, историческяй мялямть»,–мярьгсь Мордовиянь Госсобраниять Председателец. Илань мероприятиять пингста отмечазь трудовой коллектифнень путксснон республикать виияфтоманцты. Башка сюкпря азсть Отечествань аралайхненди, конат мезьдонга аф пелезь пяшкотькшнесазь воинскяй долгснон специальнай военнай операцияса. Казьфнень ёткса тя шиня—лама идь мархта семьятне. «Шабатне—минь сай пингоньке. Кеняртьфти, што Сире Шайгавонь аймакса аф кржа лама идь мархта семьяда. Государствать ширде теест максови лезкс. Мекольдень кизотнень Государственнай Собраниясь, покодемок марса Мордовиянь Оцюнять мархта, примась республикань аф кржа закон, конатнень вельде лама идь мархта семьятне марясазь пряснон сяда лац»,–азозе Владимир Чибиркин. Поздравления мархта тястонь эряйхненди пшкядсть райононь оцюнясь Геннадий Мухин, Краснослободскяй и Темниковскяй епископсь Климент. Илать ваймопожфонц мазоптозь Россиянь Заслуженнай гармонистсь Владимир Бутусов, Мордовия Республикань Заслуженнай артисткась Инна Каменева, а тяфта жа Мордовия Республикань муниципальнай райононь солисттнень и творческяй коллектифнень кштимасна-морамасна. Тя шись арась шачема крайть историянцты, национальнай коензонды-обуцянзонды и культурнай козяшинцты афкуксонь кельгомань символкс.