Саранскяйса лятфтазь Донбасса шавф шабатнень — 31 июля 2026 г. в 12:18:00.637

Саранскяйса лятфтазь Донбасса шавф шабатнень ⁣ 27 июльсь–трауронь и ризнамань ши. Тя шиня сембе Россиясь комафнесы прянц, штоба лятфтамс шабатнень, конат юмасть-арасть Донбассонь войнаса. Траурнай шись ладяфоль 2022 кизоня и лемтьфоль 2014 кизонь 27 июлень трагическяй событиятненди. Эста украинскяй нацисттне ляцендезь Горловкать, коса шавовсть мирнай эряйхть, тяконь лувксса шабат. Шавфнень ёткса ульсть 10 ковонь стирня Кира и сонь тядяц Кристина Жук, кона сембе пингс сувась историяв кода «Горловская Мадонна» и арась тядянь кельгомань символкс. Мероприятиятненди, конат ётафтовсть марнек Россияса, поладсь и Мордовия Республикань ламоц эряйхне–специальнай военнай операциянь ветераттне, общественнай организациянь активисттне, республиканскяй поисковай отрядонь и «Васенцень движениянь» участникне, школьникне. Синь кочкавсть Саранскяйса, «Донбассонь Аралайхнень» скверса, «Державная» Пресвятой Богородицать шкайнянц лемс часовнять ваксса. «27 июльсь–аф аньцек календарьса дата, тя лятфнемань и ризнамань ши сятнень колга, кинь судьбаснон колазе Украинать кяжец,–пшкядсь пуромфненди Мордовия Республикань Оцюнять и Правительствать администрацияснон руководителенц полафтыец Елена Макарова.–Шавф иттне аф кульсазь ни школань васенце пайгонять, аф азсазь «тядя» валть. Минь долгоньке–мяляфтомс синь. Мзярс минь мяляфттама колгаст, синь шисот». «Эрь шабать инь эрявикс правац–тя правась эрямс,–поладозе лятфнемань акциять МР-са идень праватнень коряс Уполномоченнайсь Наталья Юткина. –Пяк пелькс, мзярда тя правать нельгсазь шабатнень кядьста. Символичнайкс ащи ся, што минь кочкавоме часовнять ваксс. Сон лятфни церькавонь пайгонь шавомать колга, конань эзда кулеви тердемась: «Ванфтость эряфть! Ванфтость шабатнень! Шабатненди эряви эрямс!» «Минь пуромоме, штоба лятфтамс мезьсонга аф мувору жертватнень–Донбассонь иттнень. Синь эряфсна сязевсь пинкта инголе, синь мяльсна-арьсемасна аф пяшкодевихть ни,–мярьгсь Отечествань воинонь семьянь Комитетть региональнай штабонц вятиец Ольга Соболева.–Но минь мяляфтсаськ синь и тянь мархта няфтьсаськ, конашкава эряви ванфтомс мирсь. Пефтома мялям шавфнень колга!» «Кивок эздонк ашезь арьсе сянь колга, што Великай Отечественнай войнада меле, мзярда гитлеровскяй фашисттне шавондозь иттнень газовай камераса и плхнезь крематорияса, тяфтама трагедиясь кармай одукс, минь пингстонк ни. Украинскяй нацисттнень ляцендемаснон эзда шавондовихть итть,–пшкядсь пуромфненди специальнай военнай операциянь ветеранць, «Герои среди СВОих» программань выпускниксь, Мордовия Республикань СВО-нь ветеранонь Ассоциациянь председательсь, отставкаса полициянь полковниксь Александр Асманов.–Кода сетьмофтомс тядятнень-алятнень сярятьфснон, конат юмафтозь идьснон? Тя аш кода. Специальнай военнай операциянь ветераттненди ашель кода лядомс ширеса: ламоц боевой ялгане няезь сянь, мезе тиендеви Донбасса. Эрьда аф юкснесаськ тянь. Валда мялям сембе шавф иттненди». Кода азозь акциянь аноклайхне, 2014 кизоста сявомок Россияса Украинань вооруженнай формированиятнень военнай агрессияснон пингста шавовсь 300-да лама идь. Аф мувору жертватнень мялямснон пуромфне лятфтазь кашт аф молезь минутаса. Шавф иттнень инкса пичедемань тяштьксокс Пресвятой Богородицать часовнянцты путфтольхть панчфт, тяфта жа од ломаттне путсть крьвястьф лампадат и налхкшт.