Трудфтома аф ётни фкявок шиц — 31 июля 2026 г. в 08:11:03.066

Трудфтома аф ётни фкявок шиц ⁣ Атерь велеса лац содаф трудонь кельги мокшавать И.Е.Лукинать лемоц. Сон педагогическяй трудонь ветеран, вятсь историянь урокт Атерь велень 1№ средняй общеобразовательнай школаса. Тяса жа покодсь старшай пионервожатайкс, класснай руководителькс, одста ульсь аф кальдяв спортсменкакс. Тянемс и учениконза, и учитель ялганза лятфнесазь аньцек шнамань валса. ⁣ Ирина Егоровна ськамонза касфтозень эсь кафта идензон. Кафцьке арасть шнама ломанькс. Андрей Иванович—руководитель. Вятьсы Перевесье велеса хозяйствать. Сафтсы эрь тевса, машты эрь техникать мархта работама. Фермасовок содасы эрь тевть. Аф стак корхтайхть: «Кодама крандазс озат, стама мора морат». Ирина Егоровна маряй оцю гордость эсь цёранц инкса. Сон трудонь кельги, эсь тевонь содай, ломаттне шнасазь. Аф кальдяв образования получась и стирец, Татьяна Ивановна. Сон покоди Москуса, оцю фирмаса. Кодама пара ошса афоль уле, а куд строясь Атери, тядянц юрхтозонза. Аф куд, а колма этажса особняк. —Монь эряфоньберьф ашель кодамовок козяшизе,—корхтай Ирина Егоровна.—Кудозе таштоль, фалу вешсь ремонт. Ремонтонь тиемс ярмакт ашельхть. Итть касфтонь-тонафтонь. Зарплататне ёмлатольхть. Сиредембяльхть, няк, эрян особнякса. Оцю спасиба стирезти. Добувафонц усксесы аф Египету, Турцияв, а путсы тевс. Монь кенярди седиезе, што юрхтсон од куд, коса улихть сембе условиятне эрямс-ащемс. Трудта путневи пяк лама. Оцю кудса лама тевда. Синь тиемат. Тяда башка кудть перьфке оцю пере, коса мезе аньцек аш. Касфты модамарьхть, шурьхкат, пурьхкат, лия перень сёрот. Улихть кстынь плантацият, шуфтонянза. А синь урядамат, мельгаст якама. И Ирина Егоровна пара мяльса тиендьсыне сембе кудонь тевонзон, ёфси аш ваймамац и нолашиц. Эсь идьтонза башка трудонь кельги мокшавась касфтозе и кулоф сазоронц цёранянц. Мзярда лиссь оцю зиян сазоронц мархта, шабать ашезь макса идень куду, а сявозе касфтомс Ирина Егоровна. Касфтозе, рьвяяфтозе. Ужяль, но од алясь пингта инголе кулось. Лядсь цёраняц, кона тяни сонць ни аля. Но бабанц кудонцты кить ашезе юкста, сашенды сидеста. И.Е.Лукина сидеста лятфнесыне школаса покодема кизонзон. А кода синь аф лятфтамс, кда пяшксет интереснай событияса, оцю и пяк пара тевса. Мзярдовок аф юкстасыне мархтонза покоди ялганзон Н.Н.Боронинонь, И.Ф.Рапинонь, М.Я.Зеленовонь, Н.В.Сивовать, ламотнень лиятнень. Маряй оцю гордость и эсь учениконзон инкса. В.Н.Верясов покоди школань директоркс Саранск ошса. Музь эсь вастснон эряфса М.И.Енина, Н.Н.Васькина, А.И.Верясова, А.П.Алёшкина и лиятне. И.Е.Лукинась цебярь ялга и «Мокшень правдати». Газетать педагогическяй трудонь ветеранць морафнесы пара мяльса. —Газетась азонды мокшетнень эряфснон-ащефснон, пара тевснон колга,—корхтай Ирина Егоровна.—Морафнеса фалу, газетась мялезон. Илья Вешкин. Снимкаса: И.Е.Лукина ванондсы «Мокшень правда» газетать од номеронц.