Оцю Игнатоваса ётась «Велень озкс» — 31 июля 2026 г. в 07:52:00.970
Оцю Игнатоваса ётась «Велень озкс» 25 июльста Мордовиянь Оцюнясь Артём Здунов ульсь Большеигнатовскяй районца. Сон примась участия «Велень озкс» республиканскяй национально-фольклорнай иласа, корхтась райононь руководствать мархта социальнай инфраструктурать и аграрнай производствать виияфнемаснон колга. «Велень озкс» национально-фольклорнай илань ётафтома вастсь–Оцю Игнатова велесь. Организаторхне анокласть оцю программа. Тяса покодсь народнай художественнай промыслань и декоративно-прикладной творчествань ярмарка-выставка. Ваныхне пара мяльса васьфтезь театрализованнай и фольклорно-обрядовай представлениятнень, эрь кодама мастер-класснень, а стане жа райононь и республикань артисттнень кштимаснон-морамаснон. Башка мяль шарфтфоль историческяй мялямть ванфтоманцты: иласа няфтьфоль «СВО и герои» музейно-выставочнай проектсь. Спортивнай площадкаса налхксть национальнай налх- ксемаса, цёранятне и алятне оцю мяльса няфтезь эсь вийснон и асушиснон «Тюштянь налксемат» финно-угрань пялькстомань койхнень эреклафтомаса. Мордовиянь Оцюнясь поздравляндазень райононь эряйхнень и инжихнень национально-фольклорнай илать мархта и арьсесь ванфтомс ня козя койхнень-обуцятнень и пачфтемс синь од поколенияти. «Нароттне, конат ётафнесазь эсь койснон-обуцяснон поколениятнень пачк, эряйхть и кармайхть эряма веконьберьф,–мярьгсь сон.–Сюкпря илань аноклайхненди–тяза састь марнек республикаста и лия региоттнень эзда. Россиянь народонь марстоньшинь Кизоня, конань азозе Президентоньке, пяк эряви улемс марса. Пара мяльса няемс тяса идь мархта семьят. Лама идь мархта семьятне–минь странаньконь и республиканьконь нежедема вастсна!» Торжественнай обстановкаса Мордовиянь Оцюнясь поздравляндазень од рьвяяйхнень Владимир и Валерий Федосеефнень, Александр и Анна Михайлофнень, казсь казнет и арьсесь павазу семейнай эряф. Райононь эряйхнень и инжихнень тяфта жа поздравляндазь МР-нь Госсобраниять Председателец Владимир Чибиркин, РФ-нь сенаторсь, Россиянь финно-угорскяй народонь Ассоциациять председателец Пётр Тултаев, райононь оцюнясь Татьяна Полозова, Мокшэрзянь народть межрегиональнай общественнай организациянц председателец Юрий Мишанин, «Якташлар» татаронь региональнай национально-культурнай автономиять председателец Руслан Мухаев. Культуратнень диалогсна, республикаса эряй нароттнень фкя-фкянди кельгомасна и ялгаксшисна–вов регионть инь оцю козяшиц, конань вельде ули кода пяшкотькшнемс эрь кодама задачат. Мордовиянь Оцюнясь тяфта жа корхтась райононь руководствать мархта муниципалитетть виияфтоманц коряс платтнень колга, ванозень нацпроекттнень объектснон. Тяфта, райцентраса «Культура» нацпроектть коряс педа-пес петьфоль райононь историко-краеведческяй музейсь, «Инфраструктура для жизни» нацпроектть коряс петьфоль-мазоптфоль Гражданскяй ульцяса площадсь, «Семья» нацпроектть вельде эвондась пяк цебярь модельнай библиотека. Стане жа Артём Здунов ванозе районца урожаень урядамать мольфтеманц и корхтась «8-е марта» велень хозяйствань предприятиять руководстванц мархта энергосберегающай зерносушилкать строяманц коряс инвестпроектть тевс нолдаманц колга.