Лятфнезь Преподобнай Филарет Ичалковскяень — 20 августа 2026 г. в 09:58:01.006
Лятфнезь Преподобнай Филарет Ичалковскяень Преподобнай Филарет Ичалковскяень лятфнеманкса оцю крестнай ходсь ётафтовсь 16-це августста Ичалковскяй районца. Кода пачфтезь Россиянь православнай церькавонь Мордовскяй митрополиянь Ичалкань благочинияса, Кемля велень Пресвятой Богородицань Рождествань храмса ётась Божественнай литургия. Сонь аделамдонза меле паломникне мольсть Ичалкань Михайло Архангельскяй храмти, коса ащихть Преподобнай Филаретонь мощанза. Сяда тов молемась поладовсь Крута пандти, коса Преподобнай Филарет Ичалковскяй озонкшнесь. Тоса ётафтовсь акафист мархта молебен, а меле ульсь паломническяй ярхцама. Тяда меле крестнай ходонь участникне мрдасть Михайло-Архангельскяй храму, коса ётафтовсь помазание Преподобнай Филарет Ичалковскяень мощанзон мархта раканц инголе. Аделавсь Крестнай ходсь Кемля велень Пресвятой Богородицань Рождествань храмса. Филарет Ичалковскяень тястонь эряйхне нинге шиса улемстонза лемдезь чудотворецокс. Синь земляксна, тядянь-алянь лемдемаса Филипп Кулаков, шачсь 1835-це кизоня колмоце цёракс Симеон и Акилина Кулакофнень семьяса. Филиппонь оцю брадонза арасть монахокс и покодсть Ярославскяй губерниянь Толгскяй монастырьса. Фкясь синь эздост, архимандритсь Порфирий, тоса ульсь наместникокс, а омбоцесь ульсь братияса. Филипп стане жа идькс пингстокиге арьсесь лемдемс прянц монашествати. Кода корхтайхть источникне, Филипп эсь свадьбань шистонза, од рьвянять мархта арьсесь-тись кадомс тядянь-алянь кудть и тумс велеть эзда кота вайгяльбень вастса ащи Алатырь ляйть види трвазонза. Но мзярда сонь кельянц эзда аф ичкозе ушедсь Крутая Гора посёлкать строямац, Филипп тусь Саровскяй пустыняв, коса примась постриг Филарет лем ала. Пингонь ётазь сон тага мусь васта Алатырть шава трвасонза и макссь пря монашескяй тефненди и озондомати. Перьфпяльдень велень эряйхне, конатненди эрявсь духовнай лезкс, мольсть Филарет монахти, кона маштсь кулхцондома, мялень кеподема, ёню советонь максома, и корхтась сон земляконзон мархта простой шарьхкодеви кяльса. Прихожаттнень лятфнемаснон коряс, сон ашезь ноля фкявок недляшинь и илань богослужения, конат ётафневсть Ичалкань храмса. Весть, Благовещениянь карша, тундань шадаведень пингста, мзярда кеподсь ляйсь и ваяфтозень перьф- пяльдень китнень-яттнень, Филарет старецсь пачкодсь церькаву праздничнай литургиять ушедоманцты. Пожарда меле, кона ульсь 1894-це кизоня, марнек велень церькавонь зданиясь ульсь плхтаф. Велень ломаттнень мяльснон коряс кармась строявома Михаило-Архангельскяй од храмсь, конань кеподеманцты Филарет старецсь макссесь оцю лезкс. Кулось монахсь 78-це кизонц лангса 1913-це кизонь 8-це августста. Преподобнай Филарет Ичалковскяень кода местночтимай святоень канонизацияц ётась 1999-це кизонь 21-це августста Ичалкань Михаило-Архангельскяй храмса духовенствань и верондаень оцю пуромксть видеса.