#планерка
#планерка Д.Е.Корякин аатынан Оҕо спортивнай оскуолатын үлэтин туһунан дириэктэр Павел Васильевич Уйгуров кэпсээтэ. Бу оскуолаҕа 38 педагогическай үлэһит, ол иһигэр 32 тренер оҕолору 12 көрүҥүнэн дьарыктыыллар. 2025-2026 үөрэх дьылыгар 636 оҕо дьарыктана сылдьар. «Спортивные якутяне» спартакиадаҕа 2025 сылга иккис миэстэ буолбут эбит буоллахтарына, 2026 сылга үһүс миэстэни ыллылар. Быйыл РФ спордун маастарыгар кандидат нуорматын 5 оҕо, СӨ спордун маастарын нуорматын 1 оҕо толордо. Сайыҥҥы сынньалаҥ лааҕырыгар 75 оҕо хабыллыбыта. Оҕо спортивнай оскуолатын иһинэн «Дьулуур» коммерческайа суох тэриллии бырайыага РФ Президенин Пуондатын Гранын кыайан, ох саанан ытыы секциятын тэрийэн үлэлэтэргэ 2 мөлүйүөнтэн тахса суумалаах өйөбүлү ылан, номнуо үлэлэрин саҕалаабыттар. Дуобат уонна саахымат уруоктарын, секцияларын тэрийэр биир кииннэммит дьиэ-уот суоҕа тренердэри олус атахтыыр. Тренердэр уһуйааннарынан, оскуолаларынан сылдьан баҕалаах оҕолору дьарыктыырга күһэллэллэр. Салайааччы Россия, аан дойду таһымнаах күрэхтэһиилэргэ бастыҥ көрдөрүүлээх, ситиһиилээх оҕолор күрэхтэһиилэргэ кэлэр-барар ороскуоттарын улуус бюджетыттан уйуналларыгар көрдөстө. Бу улахан ороскуот барыта төрөппүттэргэ аҥардастыы сүктэриллэрэ ыараханын, оттон өйөбүл баар буоллаҕына, бу оҕолор улахан спортка тахсалларыгар күүс-көмө буолуох этэ диэн бэлиэтээтэ. @uoheebuluu